ខេត្តស្វាយរៀង៖ យ៉ាងហោចណាស់មានមនុស្សប្រុសស្រី៣២នាក់ ត្រូវសមត្ថកិច្ចចាប់ខ្លួនជាបន្តបន្ទាប់ ពាក់ព័ន្ធអំពើឆបោកតាមប្រព័ន្ធបច្ចេកវិទ្យា នៅទីតាំងចំនួន៣ផ្សេងគ្នា ក្នុង​ក្រុង​បាវិត​ ខេត្តស្វាយរៀង .....។ 

អគ្គស្នងការដ្ឋាននគរបាលជាតិ នៅរសៀលថ្ងៃទី២០ ខែមិថុនា ឆ្នាំ២០២៦ នេះ បានគូសបញ្ជាក់ថា ដោយមានការសម្របសម្រួលពីស្ថាប័នអយ្យការ កម្លាំងសមត្ថកិច្ចចម្រុះ បានឆ្មក់បង្រ្កាបទីតាំងលួចប្រព្រឹត្តិបទល្មើសអនឡាញស្កេម ដោយ​ឃាត់​ខ្លួន​មនុស្ស​៣២នាក់ ក្នុងនោះ ជនជាតិ​ចិន​២៣នាក់​ និងជនជាតិ​វៀតណាម​៩នាក់​។

ជាមួយគ្នា អាជ្ញាធរបានរឹបអូសសម្ភារពាក់ព័ន្ធនឹងបទល្មើស រួមមាន៖ កុំព្យូទ័រលើតុ All-In-One, ​កុំព្យូទ័រ​យួរដៃ​, ម៉ូនី​ទ័រ​, ធុង​ CPU​, រថយន្ត​,​ ថេប្លេត (Tablet)​,​ ទូរសព្ទដៃ, និងសម្ភារប្រើប្រាស់មួយចំនួនទៀត។ បច្ចុប្បន្ន សមត្ថកិច្ចជំនាញ កំពុងកសាងសំណុំរឿងបញ្ជូនទៅសាលាដំបូងខេត្ត​ ដើម្បីចាត់ការតាមនីតិវិធីច្បាប់។ រីឯ​ទីតាំង​ប្រព្រឹត្តិ​បទ​ល្មើស ត្រូវ​អាជ្ញាធរបិទ​ជា​បណ្ដោះអាសន្ន៕