ខេត្តសៀមរាប៖ អាជ្ញាធរជាតិអប្សរា និងអង្គការមូលនិធិសំណង់ប្រាសាទពិភពលោក (WMF) សហការគ្នាជួសជុសប្រាសាទតាសោមនៅតាមផ្នែកមួយចំនួនដែលខូចខាតខ្លាំង។ នេះបើតាមការផ្សាយរបស់អាជ្ញាធរជាតិអប្សរា នាព្រឹកថ្ងៃទី១៨មិថុនា។

អាជ្ញាធរជាតិអប្សរា គូសបញ្ជាក់ថា ការសហការគ្នាធ្វើកិច្ចការងារនេះ ដើម្បីថែរក្សាការពារប្រាសាទឱ្យនៅមានសម្រស់ និងសភាពដើម។ ប្រាសាទតាសោម ក៏ស្ថិតក្នុងរមណីយដ្ឋានអង្គរដែរ។ ប្រាសាទនេះ កសាងឡើងនៅចុងសតវត្សទី១២ ក្នុងរជ្ជកាលព្រះបាទជយវរ្ម័នទី៧។ 

ប្រាសាទតាសោម សាងសង់ពីថ្មភក់ និងថ្មបាយក្រៀម មានកំពែងខណ្ឌដាច់ពីគ្នា ចំនួន២ជាន់ និងមានខ្លោងទ្វារចេញចូលចំនួនពីរ (ទិសខាងកើត និងទិសខាងលិច)។ ចំណុចលេចធ្លោ នោះគឺ ខ្លោងទ្វារនីមួយៗមានព្រហ្មមុខបួនធំៗ និងត្រូវបានលម្អទៅដោយក្បូរក្បាច់រចនាយ៉ាងប្រណីតល្អ៕