រាជធានីបាងកក៖ មូលនិធិ «កាន ចំផាឡាំង ហ្វោនដេសិន (Kanjom Phalang Foundation)» ដែលដឹកនាំដោយបុគ្គលជ្រុលនិយមថៃឈ្មោះ កាន ចំផាឡាំង (Kan Jom Palang) កំពុងបំពេញបេសកកម្មយ៉ាងគឃ្លើននៅក្នុងតំបន់ភ្នំទ្រព្យ ដែលភាគីថៃហៅថា ភូម៉ាឃឿ (Phu Makheua) ដើម្បីសាងសង់បន្ទប់ទឹកចំនួន១០ សម្រាប់កងទ័ពជួរមុខ ឬភ្ញៀវទេសចរដែលទៅដល់ទីនោះ។ ការសាងសង់នេះ ហាក់កំពុងបង្កប់ផែនការទុច្ចរិត និងមានគោលបំណងគាំទ្រយោធាខ្លួន ក្នុងការឈ្លានពានទឹកដីកម្ពុជា។  

នៅលើគេហទំព័រហ្វេសប៊ុកមួយរបស់ថៃ បានបង្ហោះរូបភាពអំពីបេសកកម្មចុងក្រោយបង្អស់របស់មូលនិធិ កាន ចំផាឡាំង ដែលកំពុងធ្វើសកម្មដោយខុសច្បាប់លើភ្នំទ្រព្យ។ ក្រោមលេសគាំទ្រដល់យោធាថៃ និងអភិវឌ្ឍវិស័យទេសចរណ៍នាពេលអនាគត មូលនិធិ ដែលដឹកនាំដោយបុគ្គល កាន ចំផាឡាំង នេះ កំពុងសាងសង់អគារបន្ទប់ទឹកចំនួន១០បន្ទប់ នៅលើភ្នំទ្រព្យ ដែលជាតំបន់យុទ្ធសាស្ត្រ និងជាចំណុចប្រតិបត្តិការឈ្លានពានសម្រាប់យោធាថៃ។ 

សកម្មភាពចុងក្រោយរបស់មូលនិធិនេះ ដែលដឹកនាំដោយបុគ្គល​អន្យតិរ្ថីយ៍ កាន ចំផាឡាំង គឺឆ្លុះបញ្ចាំងពីស្មារតីជាតិនិយមជ្រុលរបស់សកម្មជនថៃ ដែលព្យាយាមពង្រីកឥទ្ធិពលយោធា និងបង្កើតភាពតានតឹង ដើម្បបង្កជម្លោះនៅតាមបណ្តោយព្រំដែនជាមួយកម្ពុជា។ គិតត្រឹមម៉ោងចេញផ្សាយនេះ ក្រសួង-ស្ថាប័នពាក់ព័ន្ធរបស់កម្ពុជា មិនទាន់មានប្រតិកម្ម ឬឆ្លើយតបផ្លូវការណាមួយលើសកម្មភាពដ៏គឃ្លើនរបស់ក្រុមជ្រុលនិយមថៃនេះនៅឡើយទេ។ សូមជម្រាបថា ភ្នំទ្រព្យគឺជាតំបន់យុទ្ធសាស្ត្រយោធាដ៏ស្រួចស្រាវមួយនៅក្បែរតំបន់ប្រាសាទព្រះវិហារ ដែលធ្លាប់ប៉ះទង្គិចប្រដាប់អាវុធ កំលុងពេលយោធាថៃបើកការឈ្លានពានលើដែនអធិបតេយ្យភាពកម្ពុជានាពេលកន្លងទៅ៕