រាជធានីភ្នំពេញ៖ នៅទីបំផុត ឈ្មួញទុច្ចរិត២នាក់ ត្រូវសមត្ថកិច្ចចាប់ខ្លួនបញ្ជូនទៅតុលាការ នៅថ្ងៃទី១២ ខែមិថុនា ឆ្នាំ២០២៦ ក្រោយពួកគេលួចនាំចូលសាច់បង្កកមកពីប្រទេសថៃ និងចែកចាយក្នុងភូមិសាស្ត្រខណ្ឌឫស្សីកែវ និងខណ្ឌព្រែកព្នៅ រាជធានីភ្នំពេញ.....។
គណៈបញ្ជាឯកភាពរដ្ឋបាលរាជធានីភ្នំពេញ ជាមួយអគ្គនាយកដ្ឋានការពារសិទ្ធិអ្នកប្រើប្រាស់ (ក.ប.ប) បានបើកការស្រាវជ្រាវរហូតឈានដល់ការឆ្មក់បង្ក្រាបទីតាំងចំនួន២កន្លែង រកឃើញសាច់បង្កក ជង្គង់មាន់ ស្លាបមាន់ ជើងមាន់ ព្រមទាំងឃាត់ខ្លួនមនុស្ស២នាក់ គឺលោក អ៊ុក សុក្របញ្ញារិទ្ធ ជាមេការនៅឃ្លាំងមួយកន្លែង និងលោក ភុត ប៊ុនហម ជាម្ចាស់ឃ្លាំងមួយផ្សេងទៀត (នេះជាករណី២ផ្សេងគ្នា ហើយអ្នកទាំង២នេះ ក៏មិនមែនជាកូនចៅនិងថៅកែនោះដែរ)។
ក្រៅពីការឃាត់ខ្លួនជនល្មើសទាំង២នាក់ខាងលើ អាជ្ញាធរបានបន្តដកហូត វត្ថុតាងជាសាច់បង្កកនាំមកពីថៃជាង២០០តោន។ ជាមួយគ្នា លោក ឆាយ ហុង ព្រះរាជអាជ្ញារង និងជាអ្នកនាំពាក្យអយ្យការអមសាលាដំបូងរាជធានីភ្នំពេញ បានប្រាប់អ្នកកាសែតក្នុងក្រុមតេឡេក្រាមថា អយ្យការទើបទទួលបានសំណុំរឿងនេះ និងកំពុងបើកការសាកសួរ។ គូសបញ្ជាក់ផងដែរថា ថ្មីៗនេះ សម្ដេចតេជោ ហ៊ុន សែន ប្រធានព្រឹទ្ធសភា បានប្រកាសថា នឹងជួបសួរថៅកែដែលលួចនាំចូលសាច់បង្កក ឬទំនិញពីថៃដោយផ្ទាល់តែម្តង ដើម្បីស្រាវជ្រាវរកមន្ត្រីពាក់ព័ន្ធដែលស៊ីលុយ មកទទួលខុសត្រូវចំពោះមុខច្បាប់៕
