សុខភាព៖ ការធ្វើសកម្មភាពមួយចំនួនក្រោយពីទទួលទានអាហារ ផ្តល់ផលប៉ះពាល់មិនល្អ ដែលនេះជារឿងអាចមិនមានអ្នកធ្លាប់ដឹងពីមុន។ ថ្ងៃនេះ SBM News នឹងលើកយកមកជម្រាបជូនលោកអ្នកឱ្យបានដឹងពីសកម្មភាពបីយ៉ាង ដែលគួរចៀសវាង..។
១.គេង៖ គេងភ្លាមៗក្រោយបរិភោគ អាចបង្កឱ្យមានអាការក្រហាយទ្រូង ដោយសារអាស៊ីដក្រពះ (Heartburn) និងប៉ះពាល់ដល់ដំណេក។ ដូច្នេះ ក្រោយបរិភោគអាហារឱ្យបាន៣ម៉ោងសិនចាំគេង ដើម្បីរាងកាយរំលាយអាហារបានល្អ។ ២.ហាត់ប្រាណ៖ ការហាត់ប្រាណ ឬមានសកម្មភាពច្រើនក្រោយបរិភោគអាហារ គឺមិនមែនជារឿងល្អទេ ព្រោះ អាចបង្កឱ្យមានអាការឈឺពោះ ឬរមួលក្រពើ។ ប្រសិនជាលោកអ្នកទទួលទានអាហារច្រើន យកល្អគួរចាំឱ្យបានបីទៅបួនម៉ោង មុននឹងហាត់ប្រាណ។ សម្រាប់អាហារសម្រន់វិញ អាចហាត់ប្រាណ ក្រោយទទួលទានពីមួយទៅពីរម៉ោង។
តែលោកអ្នកអាចធ្វើសកម្មភាពបានខ្លះដូចជា៖ ដើរយឺតៗក្នុងល្បឿនប្រហែល៤គីឡូម៉ែត្រក្នុងមួយម៉ោង ដែលអាចជួយដល់ការរំលាយអាហារ និងរក្សាលំនឹងកម្រិតជាតិស្ករក្នុងឈាម និងពិសាទឹក ព្រោះទឹកជួយដល់អាហារក្នុងការផ្លាស់ទីក្នុងប្រព័ន្ធរំលាយអាហារ។ ៣.ដុសធ្មេញ៖ ក្រោយពិសាអាហារភា្លមៗដែលមានជាតិអាស៊ីដដូចជា ស្រាទំពាំងបាយជូរ ឬពពួកផ្លែក្រូច គួរចៀសវាងកុំដុសធ្មេញ។ លោកអ្នកអាចដុសបាន ចាំបាន៣០នាទីសិន ព្រោះការដុសធ្មេញភ្លាមៗអាចធ្វើឱ្យធ្មេញមានសភាពខ្សោយខ្លាំង៕ ដកស្រង់ពី៖ ហេទ្បូគ្រូពេទ្យ
