សុខភាព៖ នៅរដូវភ្លៀងនេះ ​​សមត្ថភាពប្រព័ន្ធរំលាយ​អាហារចុះ​ខ្សោយ​ ដូច្នេះត្រូវប្រយ័ត្ន ក្នុង​ការទទួលទានអាហារមួយចំនួន ដែលធ្វើឱ្យប្រព័ន្ធរំលាយ​អាហារ​កាន់តែចុះខ្សោយ តួយ៉ាងគួរចៀសវាងពិសាអាហារ​៣ប្រភេទ ដែលមានដូចខាងក្រោម...។

១.អាហារ និងបន្លែឆៅ៖ អាហារ និងបន្លែឆៅ សម្បូរទៅដោយបាក់តេរី និងវីរុសធ្វើឱ្យ​រាក​ ឬឆ្លងមេរោគ​ចូល​ក្រពះ និងពោះវៀន។ ដូច្នេះ ត្រូវលាងបន្លែ ត្រី សាច់ និងផ្លែឈើ ឱ្យបានស្អាតល្អជាពិសេសបន្លែស្លឹក និងផ្សិត ព្រោះសីតុណ្ហភាព និងសំណើម នៅក្នុងរដូវភ្លៀងអំណោយផលដល់ការលូតលាស់បាក់តេរី និងមេរោគ​ផ្សិត​ លើបន្លែស្លឹក និងផ្សិត។ យកល្អគួរ ទទួលទានអាហារ​ដែលឆ្អិនល្អ​ ដើម្បីចៀសវាង​ការឆ្លងមេរោគផ្សេង​ៗ និងត្រូវពិសាទឹកឱ្យបានច្រើន កុំឱ្យរាងកាយខ្សោះជាតិទឹក។

២.អាហារបំពង៖ ទទួលទានអាហារបំពងច្រើនធ្វើឱ្យពិបាករំលាយអាហារ ដោយសារអាហារទាំងនោះ ពេលធ្លាក់ដល់ពោះ​វៀន​​ធំ ​ត្រូវបាន​បំបែកទៅជាអាស៊ីដខ្លាញ់ ដែលបណ្ដាលឱ្យពោះវៀនធំបញ្ចេញជាតិទឹក និងបង្កឱ្យទៅជារាក។ ៣.ភេសជ្ជៈមានជាតិហ្គាស៖ ភេសជ្ជៈមានជាតិហ្គាស អាចធ្វើឱ្យរលាកស្រទាប់ក្រពះ បណ្ដាលឱ្យក្រហាយទ្រូង ច្រាលអាស៊ីត ហើម​ពោះ និងអាចកាត់បន្ថយសារធាតុរ៉ែនៅក្នុងរាងកាយផងដែរ៕អត្ថបទដកស្រង់៖ Hello គ្រូពេទ្យ