រាជធានីភ្នំពេញ៖ ក្រោយយកឈ្នះក្រុមបាល់ទាត់ជម្រើសជាតិហ្វីលីពីន អាយុក្រោម១៩ឆ្នាំ (U19) ៣-០ នៅកីឡដ្ឋាន Madya 1 Stadium ប្រទេសឥណ្ឌូណេស៊ី កាលពីយប់ថ្ងៃទី៦មិថុនា ពេលនេះ ក្រុមគោព្រៃកម្ពុជា ត្រូវការឈ្នះជាចាំបាច់បំផុតក្នុងជំនួបជាមួយក្រុមបាល់ទាត់ជម្រើសជាតិអូស្ត្រាលី អាយុក្រោម១៩ឆ្នាំ(U19) ដើម្បីមានឱកាសឡើងទៅវគ្គ៤ក្រុមចុងក្រោយ នៃព្រឹត្តិការណ៍ប្រកួតបាល់ទាត់ជើងឯកយុវជនអាស៊ានឆ្នាំ២០២៦ (ASEAN U19 BOY'S CHAMPIONSHIP 2026)។
ក្រុមកីឡាបាល់ទាត់ជម្រើសជាតិអាយុក្រោម១៩ឆ្នាំកម្ពុជា (U19) ធ្វើបានយ៉ាងល្អនៅប្រកួតទីមួយទល់នឹងក្រុមបាល់ទាត់ជម្រើសជាតិអាយុក្រោម១៩ឆ្នាំហ្វីលីពីន (U19) ក្នុងលទ្ធផល ៣-០ មាន៣ពិន្ទុស្មើជាមួយក្រុមបាល់ទាត់ជម្រើសជាតិអូស្ត្រាលី ប៉ុន្តែចាញ់គ្រាប់បាល់នាំមុខ០៧គ្រាប់ក្នុងតារាងពូល C។ ក្រុមបាល់ទាត់ជម្រើសជាតិអាយុក្រោម១៩ឆ្នាំអូស្ត្រាលី (U19) បានបំបាក់ក្រុមបាល់ទាត់ជម្រើសជាតិហ្វីលីពីន យ៉ាងចាស់ដៃ ក្នុងលទ្ធផល ១០-០ កាលពីប្រកួតទី១។ ក្រោយចប់ការប្រកួតភ្លាមៗ ក្រុមគោព្រៃកម្ពុជា ស្ថិតក្នុងចំណាត់ថ្នាក់ក្រុមលេខ២ល្អ ដែលអាចអ៊ុតឱកាសការប្រកួតចុងក្រោយរបស់ខ្លួន ថាធ្វើបានល្អកម្រិតណាពេលប៉ះជាមួយក្រុមកង់គូរូអូស្ត្រាលីនៅថ្ងៃទី០៩មិថុនាស្អែកនេះ។ យ៉ាងណា ក្រុមគោព្រៃកម្ពុជា លែងមានឱកាសអ៊ុតក្រុមលេខ២ល្អទៀតហើយ បន្ទាប់ពីក្រុមវៀតណាមធ្លាក់មកដណ្តើមតំណែងមួយនេះពីដៃក្រុមគោព្រៃកម្ពុជា ដែលតម្រូវឱ្យការប្រកួតចុងក្រោយ ត្រូវតែឈ្នះជាចាំបាច់ ពុំនោះទេ ក្រុមគោព្រៃកម្ពុជា នឹងអស់ឱកាសឡើងទៅលេងវគ្គ៤ក្រុមចុងក្រោយហើយ។
សូមជម្រាបថា លទ្ធផលឈ្នះក្រុមបាល់ទាត់ជម្រើសជាតិហ្វីលីពីន ៣-០ នៅកីឡដ្ឋាន Madya 1 Stadium ប្រទេសឥណ្ឌូណេស៊ី កាលពីយប់ថ្ងៃទី៦មិថុនា ៣គ្រាប់របស់ក្រុមគោព្រៃកម្ពុជា រកបានដោយកីឡាករ សិត មហាមេធ សូឡេស នៅនាទី០៣' និងនាទី១៣' ពោលគឺរកបានពីរគ្រាប់ម្នាក់ឯង ត្រឹមរយៈពេលប្រកួតបាន១៣នាទីប៉ុណ្ណោះ។ ចំណែកគ្រាប់បាល់ទី៣ រកបានដោយ កីឡាករ ស៊ីថា ម៉េងជូ នៅនាទី៣៩'។ សម្រាប់ការប្រកួតនៅថ្ងៃស្អែកនេះផងដែរ ក្រុមគោព្រៃកម្ពុជា ទាំងផ្នែកបុរស និងនារី ត្រូវប្រកួតលក្ខណៈមិត្តភាពអន្តរជាតិ២ប្រកួត នោះគឺក្រុមគោព្រៃជម្រើសជាតិកម្ពុជា ឈុតធំជួបប្រកួតជាមួយក្រុមជម្រើសកោះហុងកុង នៃប្រទេសចិន នៅពហុកីឡដ្ឋានអន្តរជាតិអូឡាំពិក និងក្រុមគោព្រៃនារីកម្ពុជា ប្រកួតជាមួយក្រុមម្ចាស់ផ្ទះនារីឥណ្ឌូណេស៊ី នៅកីឡដ្ឋានARCAMANIK ខណៈក្រុមគោព្រៃវ័យជំទង់កម្ពុជា ជួបក្រុមខ្លាំងប្រចាំតំបន់ គឺក្រុមកង់គូរូអូស្ត្រាលី នៅកីឡដ្ឋាន Madya 1 Stadium ប្រទេសឥណ្ឌូណេស៊ី ដូចគ្នា៕
