សុខភាព៖ អាហារដែលទទួលទានចូលទៅក្នុងខ្លួនលោកអ្នកនាង ពិតជាមានសារសំខាន់ណាស់ ព្រោះបើពិសាតាមការនឹកឃើញ អាចធ្វើឱ្យក្រពះ-ពោះវៀនមានបញ្ហាធ្ងន់ធ្ងរ ជាពិសេស នៅពេលក្រពះ-ពោះវៀនកំពុងចុះខ្សោយស្រាប់ផងនោះ បើការទួលទានអាហារមិនសម្រួលតាមក្រពះ-ពោះវៀនទេ អាចនឹងរាករូស ចុករមួលពេញពោះ ព្រោះក្រពះ-ពោះវៀនធ្វើទុក្ខបុកម្នេញ ទម្រាំតែបាត់ទៅវិញមានរយៈពេលយូរម៉ោងណាស់ និងយូរៗទៅវាអាចក្លាយជាជំងឺ។ ដូច្នេះ SBM News នឹងលើកយកអាហារគួរចៀសវាងពេល ក្រពះ-ពោះវៀន លោកអ្នកនាងចុះខ្សោយចំនួន៥យ៉ាង,...។
១.កាហ្វេអ៊ីន និងជាតិអាល់កុល(ស្រាឬ ស្រាបៀរ)៖ ជាតិកាហ្វេអ៊ីន និងអាល់កុល អាចបង្កើនកម្រិតអាស៊ីដនៅក្នុងក្រពះ បណ្ដាលឱ្យលោកអ្នកនាងចង្អោរឡើង នៅក្រោយពេលទទួលទាន។ ជាតិកាហ្វេអ៊ីន អាចធ្វើឱ្យបញ្ហារាករូសកាន់តែធ្ងន់ធ្ងរ ដូច្នេះត្រូវកាត់បន្ថយ ឬបើអាចចៀសវាងបាន ការផ្អាកទទួលទានភេសជ្ជៈទាំងពីរមុខនេះ កាន់តែល្អ។ ២.បន្លែ និងផ្លែឈើឆៅ៖ បន្លែ-ផ្លែឈើល្អ តែសម្បូរដោយជាតិកាកសរសៃ សម្រួលដល់ក្រពះរំលាយអាហារបានល្អ ហេតុនេះបើលោកអ្នកកំពុងមានបញ្ហាឈឺក្រពះ-ពោះវៀន យកល្អចៀសឱ្យឆ្ងាយពីបន្លែ-ផ្លែឈើស្រស់សិន ចាំដល់ក្រពះ-ពោះវៀនស្រួលបួលវិញ អាចទទួលទានបន្លែផ្លែឈើស្រស់បាន។ ៣.អាហារបំពង៖ អាហារបំពងសម្បូរជាតិខ្លាញ់ និងប្រេង ធ្វើឱ្យក្រពះពិបាករំលាយ ដូច្នេះនេះលោកអ្នកនាងគួរកាត់បន្ថយ ដើម្បីផ្ដល់ឱកាសឱ្យក្រពះពោះវៀន បានសម្រាកខ្លះ ចៀសវាងថែមអាហារពិបាករំលាយចូលទៅក្នុងក្រពះ-ពោះវៀនដែលកំពុងមានជំងឺស្រាប់។
៤.ផលិតផលធ្វើពីទឹកដោះគោ៖ ទឹកដោះគោ ឈីស និងការ៉េម ធ្វើឱ្យពិបាករំលាយដោយសារវាសម្បូរជាតិខ្លាញ់ ដូច្នេះ លោកអ្នកនាងគួរចៀសវាងពេលឈឺពោះ ឬមានការអការរាករូស ប៉ុន្តែអាចទទួលទានយ៉ាអ៊ួគ្មានរសជាតិ (Plain yogurt) តិចតួចបាន ព្រោះវាមានផ្ទុកប្រូបាយអូទិក ដែលល្អសម្រាប់ប្រព័ន្ធរំលាយអាហារ។ ៥.អាហារសម្បូរជាតិអាស៊ីដ ពពួកផ្លែក្រូច ឬប៉េងប៉ោះ ជាអាហារមានជាតិអាស៊ីដខ្ពស់ ងាយធ្វើឱ្យពោះឈឺ និងចាល់អាស៊ីដក្រពះ ពិសេសបើមានសញ្ញានៃជំងឺរលាកពោះវៀន។ អាហារប្រភេទនេះ អាចបណ្ដាលឱ្យក្រពះ-ពោះវៀនលោកអ្នកនាង មានបញ្ហាកាន់តែធ្ងន់ធ្ងរ ដូចជា៖ ក្រហាយទ្រូង និងចង្អោរ ។ល៕ អត្ថបទដកស្រង់៖ Hello គ្រូពេទ្យ
