រាជធានីភ្នំពេញ៖ មន្ត្រីកងរាជអាវុធខណ្ឌចំនួន៣រួមមាន៖ ខណ្ឌទួលគោក, សែនសុខ និងបឹងកេងកង បានចុះបង្ក្រាបទីតាំងលក់ចែកចាយសម្ភារអាសអាភាស (សម្ភារបម្រើចំណង់ផ្លូវភេទ) និងថ្នាំសម្រើប ដោយឃាត់ខ្លួនអ្នកពាក់ព័ន្ធមានជនជាតិខ្មែរ និងចិន៩នាក់ យកមកសាកសួរនៅជំនាញការិយាល័យប្រឆាំងការជួញដូរមនុស្ស កងរាជអាវុធហត្ថរាជធានី...។
យោងតាមការឱ្យដឹងពីលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងកងរាជអាវុធហត្ថលើផ្ទៃប្រទេស ដែលបានបង្ហាញផ្សាយខ្លឹមសារព័ត៌មានខាងលើនៅលើគណនីផ្លូវការរបស់លោក គឺបន្ទាប់ពីមានការសម្របសម្រួលនីតិវិធីពីលោក ស៊ិន រក្សា ព្រះរាជអាជ្ញារងនៃអយ្យការអមសាលាដំបូងរាជធានី នៅថ្ងៃទី២៩ឧសភា ឆ្នាំ២០២៦ កម្លាំងជំនាញនៃការិយាល័យប្រឆាំងការជួញដូរមនុស្ស កងរាជអាវុធហត្ថរាជធានីភ្នំពេញ បានចុះបង្ក្រាបលើទីតាំងលក់សម្ភារអាសអាភាសចំនួន៣កន្លែង ជាបន្តបន្ទាប់ នៅខណ្ឌទាំងបីខាងលើ ដោយមន្ត្រីជំនាញធ្វើការដកហូតបាននូវ សម្ភារអាសអាភាសជាច្រើន មានដូចជា៖ អាវៈយវៈភេទស្ត្រីសិប្បនិម្មិត, លិង្គសិប្បនិម្មិតអេឡិចត្រូនិច, លិង្គសិប្បនិម្មិតជ័រ, ស្ករគ្រាប់ជំនួយអារម្មណ៍ផ្លូវភេទ និងថ្នាំ, ប្រេងចម្រុះ សង្ស័យជាសារធាតុជំនួយ និងធ្វើឱ្យរំជួលដល់ចំណង់ផ្លូវភេទ។
លោកបានឱ្យដឹងបន្តថា ក្នុងប្រតិបត្តិការចុះបង្ក្រាបទីតាំងទាំង៣នោះ មន្ត្រីកងរាជអាវុធហត្ថ ឃាត់ខ្លួនមនុស្សប្រុសស្រីបានចំនួន៩នាក់ ក្នុងនោះមានជនជាតិម្នាក់ និងខ្មែរ៨នាក់ ជាប់ពាក់ព័ន្ធនឹងការលក់សម្ភារអាសអាភាសទាំងអស់នេះ។ លោកក៏បានសង្កត់ធ្ងន់ទៅលើក្រុមអ្នកលក់ចែកចាយផលិតផលអាសអាភាសនេះផងដែរថា៖ ជនណា ចែកចាយ លក់ ជួល ដាក់តាំង បញ្ចាំង ឬបង្ហាញនៅទីសាធារណៈ នូវរូបភាព និងសម្ភារអាសអាភាស ឬកាន់កាប់ ដឹកជញ្ជូន នាំចូល នាំចេញ ផលិតរូបភាព និងសម្ភារអាសអាភាស ដើម្បីចែកចាយ លក់ ជួល ដាក់តាំង បញ្ចាំង ឬបង្ហាញនៅទីសាធារណៈ គឺត្រូវប្រឈមមុខនឹងការផ្តន្ទាទោសដាក់ពន្ធនាគារ ដែលមានចែងក្នុង ច្បាប់ ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។ ចំពោះ ជនសង្ស័យទាំង៩នាក់ ត្រូវបានកម្លាំងជំនាញការិយាល័យប្រឆាំងការជួញដូរមនុស្ស នៃ កងរាជអាវុធហត្ថរាជធានីភ្នំពេញ កសាងសំណុំរឿងបញ្ជូនទៅតុលាការ ដើម្បីចាត់ការបន្តតាមនីតិវិធីច្បាប់៕
