ក្រុងសៀមរាប៖ អង្គការគាំពារសត្វព្រៃកម្ពុជា (CWC) កាលពីរសៀលថ្ងៃទី២៥ ខែឧសភា ឆ្នាំ២០២៦ បាននាំយកសត្វកាំប្រមាចំនួន២ក្បាលប្រគល់ជូនអាជ្ញាធរជាតិអប្សរា ដើម្បីផ្សាំងទុកមួយរយៈ មុននឹងប្រលែងឱ្យរស់នៅតាមធម្មជាតិនៅក្នុងព្រៃតំបន់អង្គរ។ ប្រធានអង្គការគាំពារសត្វព្រៃកម្ពុជា (CWC) បញ្ជាក់ថា សត្វកាំប្រមាទាំងពីរក្បាលនេះ គឺទទួលបានពីមេបញ្ជាការយោធាមួយរូប នៅតំបន់អូរស្មាច់ ខេត្តឧត្តរមានជ័យ បន្ទាប់ពីមានសង្គ្រាមនៅតាមបណ្ដោយព្រំដែនកម្ពុជា-ថៃ កើតឡើង...។
លោក ទ្រី ស៊ីថេង ប្រធានអង្គការគាំពារសត្វព្រៃកម្ពុជា (CWC) លើកឡើងថា ដោយសារម្ចាស់សត្វកាំប្រមាទាំងពីរនេះ រវល់រឿងការពារព្រំដែន ម្យ៉ាងទៀតក៏ចង់ឱ្យសត្វដែលគាត់ចិញ្ចឹមទាំងពីរមានសុវត្ថិភាពផង គាត់ក៏សម្រេចប្រគល់វាមកឱ្យអង្គការគាំពារសត្វព្រៃកម្ពុជា យកមកថែរក្សាតែម្ដង។ ក្រោយទទួលបានពីម្ចាស់ដើម ប្រធានអង្គការគាំពារសត្វព្រៃកម្ពុជារូបនេះ ក៏នាំសត្វទាំងពីរមកប្រគល់បន្តឱ្យអាជ្ញាធរជាតិអប្សរា ថែរក្សាបន្តនៅតំបន់អង្គរ។ លោកប្រធានអង្គការរំពឹងថា៖«នៅពេលភ្ញៀវទេសចរជាតិ និងអន្តរជាតិមកទស្សនាអង្គរ គឺមិនត្រឹមតែឃើញប្រាសាទបុរាណតែប៉ុណ្ណោះទេ គឺចង់ឱ្យភ្ញៀវទេសចរ បានឃើញទាំងសម្បត្តិធម្មជាតិ និងសត្វព្រៃផងដែរ»។
ហាក់មិនខុសគ្នា លោក នីក ម៉ាក (Nick Marx) អ្នកជំនាញរបស់អង្គការដដែល និងជាទីប្រឹក្សាផ្នែកជីវចម្រុះ របស់អាជ្ញាធរជាតិអប្សរា លើកឡើងថា កាំប្រមាពីរក្បាល ដែលយកមកប្រគល់ជូន អាជ្ញាធរជាតិអប្សរា ពេលនេះ មិនទាន់ដោះលែងឱ្យរស់នៅក្នុងព្រៃធម្មជាតិភ្លាមៗបានទេ។ ខណៈពួកវាត្រូវផ្សាំងឱ្យស៊ាំនឹងបរិស្ថានជាមុនសិន មុនពេលដោះលែងឱ្យទៅរស់នៅក្នុងព្រៃធម្មជាតិដោយខ្លួនឯង។ លោក នីក ម៉ាក បញ្ជាក់ថា៖«នេះជាលើកទី១ហើយ ដែលអង្គការគាំពារសត្វព្រៃកម្ពុជា បានយកសត្វកាំប្រមាមកប្រគល់ជូនអាជ្ញាធរជាតិអប្សរា ឱ្យដោះលែងក្នុងព្រៃអង្គរ»។ អ្នកជំនាញសត្វព្រៃរូបនេះ បានបញ្ជាក់ពីសារសំខាន់នៃសត្វកាំប្រមាថា សត្វនេះ ក៏ដូចជាសត្វព្រៃដទៃទៀតដែរ គឺមានតួនាទីជួយឱ្យប្រព័ន្ធជីវចម្រុះធម្មជាតិ កាន់តែសម្បូរបែបឡើង តាមរយៈការស៊ីផ្លែ ហើយពាំគ្រាប់យកទៅតាមកន្លែងផ្សេងៗ ធ្វើឱ្យកូនឈើដុះលូតលាស់។
ថ្លែងក្នុងពេលជាមួយគ្នា លោក ជូរ៉ា ឌីណា អនុប្រធាននាយកដ្ឋានគ្រប់គ្រងទឹក ព្រៃឈើ និងហេដ្ឋារចនាសម្ព័ន្ធ កត់សម្គាល់ថា ក្នុងព្រៃតំបន់អង្គរ ក៏មានសត្វកាំប្រមាមួយចំនួនកំពុងរស់នៅដែរ។ ហេតុនេះ លោករំពឹងថា សត្វកាំប្រមាចំនួន២ក្បាល ដែលត្រូវលែងនៅព្រៃក្នុងតំបន់អង្គរ អាចនឹងមានសម្ព័ន្ធភាពជាមួយសត្វ ដែលរស់នៅក្នុងព្រៃអង្គរជាយូរមកហើយ ព្រមទាំងអាចបង្កើតកូនចៅបានកាន់តែច្រើន នៅពេលខាងមុខថែមទៀត ធ្វើឱ្យចំនួនសត្វកាំប្រមានៅក្នុងព្រៃអង្គរមានចំនួនកើនឡើងបន្ថែមទៀត។ គួរជ្រាបថា ចាប់តាំងពីឆ្នាំ២០១៣ គម្រោងដោះលែងសត្វព្រៃក្នុងឧទ្យានអង្គរ ក្រោមកិច្ចសហការរវាងអាជ្ញាធរជាតិអប្សរា រដ្ឋបាលព្រៃឈើភ្នំពេញ និងអង្គការ Wildlife Alliance ទទួលបានជោគជ័យ ដោយដោះលែងសត្វព្រៃជាច្រើនប្រភេទ ចូលក្នុងព្រៃធម្មជាតិនៃឧទ្យានអង្គរ។
សត្វទាំងនោះរួមមាន៖ សត្វទោចមកុដចំនួន១៧ក្បាល (កើតកូនបានចំនួន៩ក្បាល), សត្វឈ្លូស (Red Muntjac) ចំនួន៧ក្បាល, សត្វស្វាព្រាហ្មណ៍ ឬស្វាព្រាមចំនួន១២ក្បាល (កើតកូនបាន១៨ក្បាល), សត្វសំពោចក្រអូបចំនួន៧ក្បាល, សត្វភេខ្លួនរលោងចំនួន១៥ក្បាល (កើតកូនបានចំនួន១២ក្បាល), សត្វឆ្មាដាវចំនួន៣ក្បាល, សត្វកេងកងតូចចំនួន៩ក្បាល, សត្វកេងកងធំចំនួន៦ក្បាល, សត្វភូវាំងចំនួន៧ក្បាល, សត្វក្ងោកចំនួន៩ក្បាល, សត្វអន្សងចំនួន២ក្បាល, សត្វពង្រូលចំនួន២ក្បាល និងសត្វផ្សេងៗមួយចំនួនទៀត។ បច្ចុប្បន្នសត្វទាំងអស់នោះ នៅតែបន្តវត្តមាន ក្រោមការយកចិត្តទុកដាក់តាមដាន និងថែទាំជាប្រចាំពីក្រុមការងារជំនាញ៕
