ខេត្តកំពង់ធំ៖ ក្រោយទទួលបានព័ត៌មានសម្ងាត់ កងកម្លាំងយោធានៃបញ្ជាការតំបន់ប្រតិបត្តិការសឹករងខេត្តកំពង់ធំ បានចុះស្ទាក់ចាប់គោយន្តដឹកឈើខុសច្បាប់ចំនួន២គ្រឿង នៅតំបន់ព្រៃសហគមន៍អូរដាស់ស្គរ នៅវេលាម៉ោង៤ទៀបភ្លឺ ថ្ងៃទី២២ ខែឧសភា ឆ្នាំ២០២៦...។
លោកឧត្ដមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ដ្រៃយ៍នៃគណៈកម្មការបង្ក្រាបបទល្មើសធនធានធម្មជាតិខេត្តកំពង់ធំ បានទៅពិនិត្យគោយន្ដកន្ត្រៃដឹកជញ្ជូនឈើខុសច្បាប់២គ្រឿងដែលកងកម្លាំងស្ទាក់ចាប់បានក្នុងពេលជនល្មើសកំពុងដឹកជញ្ជូនឈើខុសច្បាប់ចេញពីតំបន់ព្រំប្រទល់ខេត្តកំពង់ធំ និងខេត្តក្រចេះ។ គោយន្ដកន្ត្រៃចំនួន២គ្រឿង បានដឹកជញ្ជូនឈើចម្រៀកពេញគោយន្តចេញដំណើរពីតំបន់ព្រំប្រទល់ខេត្តកំពង់ធំ និងខេត្តក្រចេះ នឹងចូលដល់ទឹកដីខេត្តកំពង់ធំ នៅវេលារំលងអាធ្រាត្រ ដោយឆ្លងកាត់តំបន់ព្រះអាទិត្យ ស្នាក់ការបរិស្ថានខេត្តកំពង់ធំ ហើយនៅវេលាទៀបភ្លឺ បានចូលដល់តំបន់ព្រៃសហគមន៍អូរដាស់ស្គរ ក្នុងឃុំមានរិទ្ធិ ស្រុកសណ្តាន់ ខេត្តកំពង់ធំ ទើបត្រូវបានកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំស្ទាក់ចាប់បាន។
លោកអនុសេនីយ៍ទោ ឃាន តុងហ៊ាន់ នាយទាហាននៃបញ្ជាការដ្ឋានតំបន់ប្រតិបត្តិការសឹករងកំពង់ធំ និងជាប្រធានក្រុមទីបញ្ជាការប្រចាំការនៅតំបន់ព្រៃសហគមន៍អូរក្រញូង បញ្ជាក់ថា ប្រតិបត្តិការបង្ក្រាបនេះធ្វើឡើងក្រោយទទួលបានព័ត៌មានពីបណ្ដាញសម្ងាត់។ ទោះយ៉ាងណា ជនសង្ស័យជាម្ចាស់គោយន្ដ បានរត់គេចខ្លួនបាត់។
លោកឧត្ដមសេនីយ៍ទោ សោម ស៊ុន បានថ្លែងអំណរគុណចំពោះ លោកអនុសេនីយ៍ទោ ឃាន តុងហ៊ាន់ដែលបានដឹកនាំសកម្មភាពបង្ក្រាបបទល្មើស ការដឹកជញ្ជូនឈើខុសច្បាប់បានយ៉ាងលំបាកនេះ ដោយសារជនល្មើសបានប្រើប្រាស់គ្រប់រូបភាព និងបណ្ដាញយ៉ាងប្រទាក់ក្រឡា ដើម្បីប្រព្រឹត្តិបទល្មើសក្នុងការដឹកជញ្ជូនឈើខុសច្បាប់ តែមិនអាចគេចផុតពីកងកម្លាំងដែលខិតខំព្យាយាម។ លោកឧត្ដមសេនីយ៍ទោ បានប្រគល់ឈើ និងវត្ថុតាង ដែលដឹកជញ្ជូនបទល្មើសព្រៃឈើទៅស្ថាប័នសង្កាត់រដ្ឋបាលព្រៃឈើ ទំរីង ស្រុកសណ្តាន់ និងបន្តស្រាវជ្រាវមុខសញ្ញាជនប្រព្រឹត្តបទល្មើស ដើម្បីបញ្ជូនទៅកាន់តុលាការផ្តន្ទាទោសតាមច្បាប់ដោយគ្មានការលើកលែងឡើយ៕
