រាជធានីភ្នំពេញ៖ ទោះមិនទាន់មកដល់កម្ពុជា តែក្រសួងសុខាភិបាល ណែនាំឱ្យក្រុមការងារចត្តាទ្បីស័កអនុវត្តវិធានសុខាភិបាលភ្លាមៗ ក្នុងករណីពិនិត្យឃើញអ្នកដំណើរណាមួយ មានការទ្បើងកម្តៅចាប់ពី៣៨អង្សាសេ។ នេះជាការគូសបញ្ជាក់របស់ លោកស្រីវេជ្ជបណ្ឌិត យក់ សម្បត្តិ រដ្ឋលេខាធិការទទួលបន្ទុកការងារជំងឺឆ្លងនៃក្រសួងសុខាភិបាល ក្នុងកិច្ចប្រជុំស្តីអំពីការពង្រឹង និងពិនិត្យលើការបង្ការ ទប់ស្កាត់ នូវការនាំចូលជាយថាហេតុនៃជំងឺអេបូឡា(Ebola)..។
កិច្ចប្រជុំដែលមានការអញ្ជើញចូលរួមពី លោក លោកស្រី តំណាងនាយកដ្ឋានប្រយុទ្ធនឹងជំងឺ វិទ្យាស្ថានជាតិសុខភាពសាធារណៈ តំណាងអគ្គនាយកដ្ឋានអន្តោប្រវេសន៍ វិទ្យាស្ថានប៉ាស្ទ័រកម្ពុជា អាកាសយានដ្ឋានអន្តរជាតិតេជោ និងក្រុមការងារពាក់ព័ន្ធផ្សេងៗទៀត តាមរយៈប្រព័ន្ធនិម្មិត (Zoom) កាលពីថ្ងៃទី២០ ខែឧសភា ឆ្នាំ២០២៦ លោកស្រីវេជ្ជបណ្ឌិត យក់ សម្បត្តិ ណែនាំឱ្យតាមដានជាប់ជាប្រចាំ តាមរយៈការស្កែនកម្តៅគ្រប់អ្នកដំណើរចូលទាំងអស់ នៅតាមទីតាំងអ្នកដំណើរមកដល់។ លោកស្រីសង្កត់ធ្ងន់ថា៖«ក្នុងករណីពិនិត្យឃើញ មានការទ្បើងកម្តៅចាប់ពី៣៨អង្សាសេ លើអ្នកដំណើរណាមួយ ក្រុមការងារចត្តាទ្បីស័ក នឹងអនុវត្តវិធានសុខាភិបាលភ្លាមៗ»។ បន្ថែមលើនោះ ក្នុងករណីមានអ្នកដំណើរមកពីប្រទេស ដែលមានការប្រឈមខ្ពស់ ហើយរកឃើញករណីសង្ស័យណាមួយ ការអនុវត្តវិធានសុខាភិបាល ត្រូវតែអនុវត្តជាបន្ទាន់ និងត្រៀមមន្ទីរពេទ្យជាតិតេជោសន្តិភាព សម្រាប់ការដាក់នៅដាច់ដោយឡែក (Isolation) និងធ្វើការព្យាបាលជាបន្ទាន់។ ជាមួយគ្នានេះ ក្រុមការងារចត្តាឡីស័ក ត្រូវសហការជាមួយក្រុមការងារអាកាសយានដ្ឋានពង្រឹង និងតាមដានជាប្រចាំ ដើម្បីទប់ស្កាត់ការឆ្លងចូលនៃជំងឺអេបូឡាជាយថាហេតុ។
ក្នុងខែឧសភាឆ្នាំ២០២៦ អង្គការសុខភាពពិភពលោក បានប្រកាសពីការឆ្លងជំងឺអេបូឡា នៅតាមបន្ទាត់ព្រំដែនកុងហ្គោ ទៅកាន់ប្រទេសអ៊ូហ្គង់ដា បណ្ដាលឱ្យមានអ្នកឆ្លង និងស្លាប់។ អេបូឡា ជាជំងឺឆ្លងធ្ងន់ធ្ងរបង្កដោយក្រុមវីរុសអេបូឡា អាចបណ្ដាលឱ្យស្លាប់ក្នុងអត្រាខ្ពស់រហូតដល់៨០-៩០ភាគរយ ប្រសិនបើមិនទទួលបានការព្យាបាលទាន់ពេលវេលា។ វីរុសនេះ ត្រូវបានគេរកឃើញនៅឆ្នាំ១៩៧៦ នៅសាធារណរដ្ឋប្រជាធិបតេយ្យកុងហ្គោ ហើយភាគច្រើនត្រូវបានរកឃើញនៅតំបន់វាលសាហារ៉ានៃទ្វីបអាហ្វ្រិក។ ជំងឺអេបូឡា ឆ្លងតាមការប៉ះផ្ទាល់ជាមួយឈាម ឬសារធាតុរាវក្នុងរាងកាយរបស់អ្នកជំងឺ ឬអ្នកស្លាប់ដោយសារជំងឺអេបូឡា ឬសម្ភារដែលមានផ្ទុកវីរុសអេបូឡា។ វាក៏អាចឆ្លងដោយកម្រតាមរយៈការប៉ះពាល់ជាមួយសត្វដែលមានផ្ទុកវីរុសអេបូឡា ដូចជា ពពួកអម្បូរសត្វប្រចៀវ ជ្រឹង ឈ្លូស ប្រើស និងស្វា ដែលរស់នៅក្នុងតំបន់ព្រៃក្រាស់ៗនៅទ្វីបអាហ្វ្រិក៕
