សុខភាព៖ ផ្លែចេក មានគុណប្រយោជន៍ជាច្រើនដល់រាងកាយ បើសំបកវិញក៏មិនធម្មតាដែរ អាចយកមកថែសម្រស់បាន ព្រោះសំបកចេកសម្បូរទៅដោយប៉ូតាស្យូម និងជាតិសំណើម ដែលល្អបំផុតចំពោះស្បែក ដូច្នេះ នារីៗដែលចង់បានស្បែកមុខស្អាតបែបធម្មជាតិ កុំលងសំបកចេកឱ្យសោះ។ វិធីប្រើសំបកចេកមានដូចខាងក្រោមនេះ…។
១.បិទក្រោមភ្នែក៖ សំបកចេក ជួយកម្ចាត់ស្នាមជ្រីវជ្រួញក្រោមភ្នែក ក៏ដូចជាធ្វើឱ្យស្បែកនៅបរិវេណភ្នែក មានសភាពភ្លឺថ្លាទ្វេដង។ របៀបធ្វើ៖ កាត់សំបកចេកជា២ចំណិតហើយទុកវានៅក្នុងទូរទឹកកក ក្រោយមកយកបិទនៅបរិវេណក្រោមភ្នែក ទុកចោលរយៈពេល១៥ទៅ២០នាទី រួចលាងជម្រះចេញ និងលាបក្រែមការពារក្រោមភ្នែកជាការស្រេច។ ២.ជូតសំបកចេកលើផ្ទៃមុខ៖ ការជូតសំបកចេកលើផ្ទៃមុខអាចកាត់បន្ថយស្នាមជ្រីវជ្រួញ ស្បែកស្ងួត និងអាចបង្ការការកើតមុនថែមទៀតផង។ របៀបធ្វើ៖ លាងសម្អាតមុខឱ្យស្អាត និងជូតមុខឱ្យស្ងួត ហើយយកសំបកចេកមកម៉ាស្សានៅលើផ្ទៃមុខ។ ប្រសិនបើសំបកចេកប្រែទៅពណ៌ត្នោតប្រើថ្មីមួយទៀត ដោយទុកចោលរយៈពេល១០នាទី រួចលាងសម្អាតជាមួយទឹកត្រជាក់។
៣.ស្ក្រាប់សំបកចេក៖ ការប្រើស្ក្រាប់មានសារសំខាន់ណាស់ ដើម្បីថែទាំស្បែកឱ្យមានសុខភាពល្អ ព្រោះវាអាចជួយកម្ចាត់កោសិកាស្បែកដែលងាប់ និងជួយបញ្ចៀសបញ្ហាស្បែកស្ងួត។ ការធ្វើស្ក្រាប់សំបកចេកជាមួយរមៀត មានប្រសិទ្ធភាពល្អក្នុងការជួយថែបំប៉នស្បែកប្រឆាំងនឹងបញ្ហាមុន កម្ចាត់ស្បែកងាប់ និងស្លាកស្នាមនៃស្បែក។ របៀបធ្វើ៖ កាត់សំបកចេកជាចំណិតតូចៗ និងបន្ថែមម្សៅរមៀតចំនួន១ស្លាបព្រាបាយជាមួយស្ករ និងទឹកឃ្មុំចំនួន១ស្លាបព្រាកាហ្វេ រួចកូរឱ្យសព្វ។ បន្ទាប់មកលាបនៅលើមុខ ដោយទុកចោលរយៈពេល១៥ទៅ២០នាទី ទើបលាងជម្រះចេញជាមួយទឹកក្ដៅឧណ្ហៗ រួចជាការស្រេច៕ អត្ថបទពី៖ Hello គ្រូពេទ្យ
