សុខភាព៖ ផ្លែប៉ោម ជាផ្លែឈើមួយដែលមានរសជាតិផ្អែមឆ្ងាញ់ មួយវិញទៀត ក៏បានផ្តល់នូវគុណប្រយោជន៍ដល់រាងកាយ៦យ៉ាងផងដែរ ដូច្នេះ ក្នុងរបបអាហារប្រចាំថ្ងៃរបស់លោកអ្នក គួរមានផ្លែប៉ោមកុំខាន...។
អត្ថប្រយោជន៍របស់ផ្លែប៉ោម រួមមាន៖ ១.សម្រកទម្ងន់៖ តាមការសិក្សាមួយ បានបង្ហាញថា អ្នកដែលទទួលទានផ្លែប៉ោម មុនពេលបរិភោគអាហារនឹងមានអារម្មណ៍ថាឆាប់ឆ្អែត ជាងអ្នកដែលមិនបានទទួលទានផ្លែប៉ោមទាល់តែសោះ។ ការសិក្សាដដែលបញ្ជាក់ថា ការបរិភោគអាហារជាមួយផ្លែប៉ោម ជួយឱ្យរាងកាយទទួលបានកាឡូរី ជាមធ្យមតិចជាង២០០កាឡូរី បើធៀបនឹងអ្នកដែលមិនបរិភោគផ្លែប៉ោម។ ២.សម្រួលដល់ការរំលាយអាហារ៖ ផ្លែប៉ោម សម្បូរទៅដោយជាតិសរសៃច្រើន ជួយពន្យឺតដល់ការរំលាយអាហារធ្វើឱ្យមានអារម្មណ៍ថា ឆ្អែត និងពន្យឺតការរំលាយគ្លុយកូស ជួយគ្រប់គ្រងជាតិស្ករក្នុងឈាមបានល្អ។ លើសពីនេះ ជាតិសរសៃ ក៏អាចសម្រួលដល់ការទល់លាមកដែរ។ ៣.ប្រឆាំងនឹងជំងឺមហារីក៖ ផ្លែប៉ោម ជាភ្នាក់ងារប្រឆាំងនឹងអុកស៊ីតកម្មដែលប្រយុទ្ធប្រឆាំងនឹងជំងឺមហារីកឈានមុនគេលំដាប់ទី២។ ការបរិភោគផ្លែប៉ោម នឹងជួយកាត់បន្ថយហានិភ័យនៃជំងឺមហារីកមួយចំនួន រួមមាន៖ មហារីកពោះវៀនធំ មហារីកសុដន់ និងមហារីកក្រពេញប្រូស្តាត។
៤.បង្កើនសុខភាពខួរក្បាល៖ ការសិក្សាមួយបានលើកទ្បើងថា សម្រាប់មនុស្សវ័យចំណាស់ ដែលតែងទទួលទានផ្លែឈើស្រស់ៗ និងបន្លែជាប្រចាំ អាចជួយកាត់បន្ថយហានិភ័យនៃជំងឺភ្លេចភ្លាំងបានរហូតដល់៣០ទៅ៣៥ភាគរយ ហើយនៅពេលដែលប្រកាន់ខ្ជាប់របបអាហារទាំងនេះ កាន់តែយូរ មុខងារនៃការយល់ដឹងក៏កាន់តែប្រសើរឡើងដូចគ្នា។ ៥.ការពារបេះដូង៖ ផ្លែប៉ោម សម្បូរទៅដោយជាតិសរសៃខ្ពស់ មានគុណប្រយោជន៍ក្នុងការធ្វើឱ្យកម្រិតកូលេស្តេរ៉ូលកាន់តែប្រសើរជាងមុន។ អ្នកចូលចិត្តទទួលទានផ្លែឈើទាំងមូល រួមទាំងផ្លែប៉ោម នោះ មានឱកាសលើសសម្ពាធឈាមតិចតួច។ ហើយចំពោះស្ត្រីដែលបរិភោគផ្លែប៉ោមច្រើនជាង៧ឆ្នាំ អាចជួយកាត់បន្ថយហានិភ័យនៃជំងឺបេះដូង បានរហូតដល់២២ភាគរយ។ ៦.កាត់បន្ថយហានិភ័យនៃជំងឺទឹកនោមផ្អែមប្រភេទ២៖ ផ្លែប៉ោម មានអត្ថប្រយោជន៍ទប់ស្កាត់ជំងឺទឹកនោមផ្អែម។ ទទួលទានផ្លែប៉ោមមួយផ្លែ ឬច្រើនជាងនេះក្នុងមួយថ្ងៃ អាចកាត់បន្ថយហានិភ័យនៃជំងឺទឹកនោមផ្អែមប្រភេទ២ បានរហូតដល់ទៅ២៣ភាគរយ បើប្រៀបធៀបទៅនឹងអ្នកមិនទទួលទានសោះ៕ អត្ថបទពី៖ Hello គ្រូពេទ្យ
