សុខភាព៖ បាយ មានជាតិស្ករខ្ពស់ និងងាយរំលាយធ្វើឱ្យជាតិស្ករក្នុងឈាមឡើងលឿន។ ការទទួលទានបាយច្រើនអាចបណ្ដាលឱ្យមានហានិភ័យ កើតជំងឺទឹកនោមផ្អែមប្រភេទ២ តែបាយជាអាហារថាមពលដែលមិនអាចចោលបាន ព្រោះការទទួលទានបាយធ្វើឱ្យនឹងពោះ និងឆ្អែតបានយូរ មានកម្លាំងធ្វើការងារផ្សេងៗ ប៉ុន្តែយ៉ាងណាកុំបារម្ភ SBM News នឹងប្រាប់ពីវិធីដែលហូបបាយបែបណា កាត់បន្ថយការកើតជំងឺទឹកនោមផ្អែម...។
១.បាយអង្ករសម្រូប៖ អង្ករសម្រូបមានវីតាមីន សារធាតុរ៉ែ និងជាតិសរសៃច្រើន ។ បាយអង្ករសម្រូបត្រូវបានបំបែកទៅជាគ្លុយកូស (ជាតិស្ករក្នុងឈាម) យឺតៗ ព្រោះជាតិសរសៃនៅក្នុងអង្ករសម្រូប ជួយបន្ថយល្បឿននៃជាតិស្ករជ្រាបចូលទៅក្នុងចរន្តឈាម។ យោងតាមការសិក្សារបស់ លោកវេជ្ជបណ្ឌិត ជី ស៊ុន (Qi Sun) អ្នកស្រាវជ្រាវផ្នែកអាហារូបត្ថម្ភ បានលើកឡើងថា អ្នកដែលបរិភោគបាយពីអង្ករសម្រូប យ៉ាងហោចណាស់២ដងក្នុងមួយសប្តាហ៍ អាចកាត់បន្ថយហានិភ័យកើតទឹកនោមផ្អែមប្រភេទ២បានដល់១១ភាគរយ។ រីឯអ្នកទទួលទានបាយស៥ដង ឬច្រើនជាង៥ដង ក្នុងមួយសប្តាហ៍ មានហានិភ័យក្នុងការកើតទឹកនោមផ្អែមប្រភេទ២ដល់ទៅ១៧ភាគរយ។
២.បាយលាយសណ្តែក៖ សណ្តែកហោឡាំងតៅ សណ្តែកក្រហម សណ្តែកបាយ ឬសណ្តែកខ្មៅ មានជាតិសរសៃខ្ពស់ និងមានជាតិម្សៅ ដែលអាចកាត់បន្ថយល្បឿនរំលាយអាហារ និងល្បឿនបំប្លែង ទៅជាជាតិស្ករក្នុងឈាម។ មួយវិញទៀត សណ្តែកមានសារធាតុចិញ្ចឹមសំខាន់ៗដូចជា ម៉ាញ៉េស្យូម កាល់ស្យូម ប៉ូតាស្យូម ស័ង្កសី ជាតិដែក វីតាមីន B និងសារធាតុដែលអាចរារាំងសមត្ថភាពរបស់ឈាមក្នុងការស្រូបយកជាតិស្ករ។ បើតាមអ្នកស្រាវជ្រាវជាន់ខ្ពស់នៅមជ្ឈមណ្ឌលស្រាវជ្រាវ និងអភិវឌ្ឍន៍ ក្នុងប្រទេសកាណាដា បានលើកទ្បើងដែរថា បើចង់កាត់ហានិភ័យការកើតជំងឺទឹកនោមផ្អែម លោកអ្នកនាង អាចទទួលទានបាយលាយជាមួយសណ្តែក ដោយលាយបាយពាក់កណ្តាល និងសណ្តែកពាក់កណ្តាល។ ការហូបបែបនេះ អាចជួយកាត់បន្ថយការហូបបាយបានពាក់កណ្តាល និងជួយមិនឱ្យជាតិស្ករក្នុងឈាមឡើង៕ អត្ថបទដកស្រង់៖ Hello គ្រូពេទ្យ
