រាជធានីឡុងដ៍៖ កាលពីថ្ងៃអង្គារទី១២ ខែឧសភា ចក្រភពអង់គ្លេស បានប្រកាសថា នឹងចូលរួមចំណែកនូវឧបករណ៍បោសសម្អាតមីន យន្តហោះ និងនាវាចម្បាំងទៅចូលរួមបេសកកម្មពហុសាសន៍ ក្នុងគោលបំណងការពារសុវត្ថិភាពនាវាចរណ៍នៅក្នុងច្រកសមុទ្ទហ័រមូស្ស...។

រដ្ឋមន្ត្រីក្រសួងការពារជាតិអង់គ្លេស លោក ចន ហ៊ីឡី (John Healey) បានប្រកាសពីការប្តេជ្ញាចិត្តនេះ ក្នុងអំឡុងពេលកិច្ចប្រជុំកំពូលតាមប្រព័ន្ធវីដេអូជាមួយសមភាគីមកពីជាង៤០ប្រទេសផ្សេងទៀត ដែលពាក់ព័ន្ធនឹងបេសកកម្មនេះ។ លោកបញ្ជាក់ថា បេសកកម្មនេះនឹងចាប់ផ្តើមដំណើរការនៅពេលដែលលក្ខខណ្ឌអំណោយផល។ «ជាមួយសម្ព័ន្ធមិត្តរបស់យើង បេសកកម្មពហុជាតិសាសន៍នេះ នឹងមានលក្ខណៈការពារខ្លួន ឯករាជ្យ និងគួរឱ្យជឿជាក់» នេះបើតាម លោក ហ៊ីឡី បានលើកឡើងក្នុងសេចក្តីថ្លែងការណ៍។

រាជរដ្ឋាភិបាលអង់គ្លេស នឹងផ្តល់ថវិកាថ្មីចំនួន១១៥លានផោន ឬប្រហែល១៥៥,៥៣ លានដុល្លារ សម្រាប់ឧបករណ៍បោសសម្អាតមីន និងប្រព័ន្ធការពារ។ ឧបករណ៍ស្វែងរកគ្មានមនុស្សបើក និងដ្រូនបោសសម្អាតមីនក្នុងទឹក, ទូកគ្មានមនុស្សបើកល្បឿនលឿន, យន្តហោះចម្បាំង Typhoon សម្រាប់ល្បាតផ្លូវអាកាស, នាវាចម្បាំង HMS Dragon កំពុងធ្វើដំណើរទៅកាន់មជ្ឈិមបូព៌ា។ សង្គ្រាមនៅអ៊ីរ៉ង់ បានធ្វើឱ្យប៉ះពាល់យ៉ាងធ្ងន់ធ្ងរដល់នាវាចរណ៍ឆ្លងកាត់តាមច្រកសមុទ្ទហ័រមូស្ស ដែលជាផ្លូវទឹកដ៏សំខាន់សម្រាប់ដឹកជញ្ជូនប្រេងប្រមាណ២០ភាគរយ និងទំនិញគ្រប់ប្រភេទនៃពិភពលោក។ ការរំខាននេះ បានបណ្ដាលឱ្យការនាំចេញប្រេងមានភាពរអាក់រអួល និងធ្វើឱ្យតម្លៃថាមពលហក់ឡើងខ្ពស់កប់ពពក។ គួរបញ្ជាក់ថា បច្ចុប្បន្ន អង់គ្លេសមានកងកម្លាំងជាង ១០០០នាក់ នៅក្នុងតំបន់នេះ៕