រដ្ឋធានីប៉េកាំង៖ កាលពីថ្ងៃចន្ទទី១ធ្នូ នាយករដ្ឋមន្ត្រីអង់គ្លេស លោក ឃៀ ស្តាមើរ បានប្រកាសក្តែងៗ ថាចិនបានបង្កការគំរាមកំហែងសន្តិសុខជាតិដល់ចក្រភពអង់គ្លេស។ មិនបង្អង់យូរមួយថ្ងៃបន្ទាប់ មហាយក្សចិនបានតបតវិញ ដោយចោទប្រកាន់នាយករដ្ឋមន្ត្រីអង់គ្លេសថា ការចោទប្រកាន់នោះ គ្មានមូលដ្ឋានច្បាស់លាស់...។

លោក ស្តាមើរ បានក្លាយជានាយករដ្ឋមន្ត្រីអង់គ្លេសដំបូងគេ ដែលបានជួបជាមួយមេដឹកនាំចិន លោក ស៊ី ជីនពីង ក្នុងរយៈពេលជាងកន្លះទសវត្សរ៍ កាលពីកំលុងខែវិច្ឆិកា ឆ្នាំ២០២៤ ជាសញ្ញាមួយដែលបង្ហាញថា ទំនាក់ទំនងកំពុងមានភាពប្រសើរឡើង។ ប៉ុន្តែថ្លែងនៅក្នុងពិធីជប់លៀងប្រចាំឆ្នាំមួយ កាលពីថ្ងៃទី១ធ្នូ លោក ស្តាមើរ បាននិយាយថា ប្រទេសចិនបង្កការគំរាមកំហែងសន្តិសុខជាតិពិតប្រាកដ ហើយបាននិយាយថា រាជធានីឡុងដ៍ នឹងបន្តលើកឡើងពីបញ្ហាសិទ្ធិមនុស្សជាមួយរដ្ឋធានីប៉េកាំង។ លោក ស្តាមើរ ក៏បាននិយាយផងដែរថា ចក្រភពអង់គ្លេស នឹងបន្តលើកឡើងពីការរឹតត្បិតសេរីភាពនៅទីក្រុងហុងកុង។

កាលពីថ្ងៃទី២ធ្នូដដែល ស្ថានទូតចិនប្រចាំរាជធានីឡុងដ៍ បានបញ្ចេញសេចក្តីថ្លែងការណ៍មួយថា៖«យើងប្រឆាំងយ៉ាងដាច់អហង្កា ចំពោះការកត់សម្គាល់របស់ភាគីអង់គ្លេស..ដែលចោទប្រកាន់ចិនដោយគ្មានមូលដ្ឋាន និងជ្រៀតជ្រែកកិច្ចការផ្ទៃក្នុងរបស់ចិន។ ការអភិវឌ្ឍរបស់ប្រទេសចិន មិនបង្កការគំរាមកំហែងដល់ប្រទេសណាមួយឡើយ ដោយបន្ថែមថា ការកត់សម្គាល់របស់លោក ស្តាមើរ គឺមានកំហុស។» ស្ថានទូតចិនបានបន្ថែមថា បញ្ហាហុងកុង គឺជាកិច្ចការផ្ទៃក្នុងរបស់ប្រទេសចិន។ ចក្រភព​អង់គ្លេស ​មិន​មាន​លក្ខណៈសម្បត្តិ​គ្រប់គ្រាន់ ឬ​សិទ្ធិ​ក្នុង​ការ​ធ្វើការ​កត់សម្គាល់​ដែល​គ្មាន​មូលដ្ឋាន ឬ​ជ្រៀតជ្រែក​មិន​ត្រឹមត្រូវ​នោះ​ទេ។

រដ្ឋាភិបាលពលកររបស់លោក ស្តាមើរ បានធ្វើឱ្យទំនាក់ទំនងប្រសើរឡើងជាមួយប្រទេសចិន ក្លាយជាអាទិភាពគោលនយោបាយការបរទេសមួយរបស់ខ្លួន ប៉ុន្តែទំនាក់ទំនងរវាងប្រទេសទាំងពីរ ត្រូវបានធ្វើឱ្យតានតឹងដោយការចោទប្រកាន់របស់អង់គ្លេស លើរដ្ឋធានីប៉េកាំង ពីបទចារកម្ម។ ដោយហៅ ការខ្វះការចូលរួមរបស់រដ្ឋាភិបាលអភិរក្សនិយមមុនជាមួយប្រទេសចិន ថា ជាការធ្វេសប្រហែសកាតព្វកិច្ច លោក ស្តាមើរ បាននិយាយថា ចាប់តាំងពីឆ្នាំ២០១៨ ប្រធានាធិបតីបារាំង លោក អេម៉ានូអែល ម៉ាក្រុង បានទៅទស្សនកិច្ចប្រទេសចិនពីរដង ហើយមេដឹកនាំអាល្លឺម៉ង់បានទៅទស្សនកិច្ចប្រទេសចិន៤ដង។

ប៉ុន្តែមេដឹកនាំអង់គ្លេសចុងក្រោយ ដែលបានទៅទស្សនកិច្ចប្រទេសចិន គឺអតីតនាយករដ្ឋមន្ត្រី ថេរេសា ម៉េ (Theresa May) ក្នុងឆ្នាំ២០១៨។ យោងតាមប្រភពព័ត៌មាន លោក ស្តាមើរ កំពុងរៀបចំទៅទស្សនកិច្ចប្រទេសចិន នៅឆ្នាំក្រោយ បន្ទាប់ពីដំណើរទស្សនកិច្ចរបស់រដ្ឋមន្ត្រីគណៈរដ្ឋមន្ត្រី យ៉ាងហោចណាស់បួនរូបចាប់តាំងពីគណបក្សពលកម្ម ត្រូវបានជាប់ឆ្នោតកាលពីឆ្នាំមុន៕