រដ្ឋធានីវ៉ាស៊ីនតោន៖ លោកប្រធានាធិបតីសហរដ្ឋអាម៉េរិក ដូណាល់ ត្រាំ បានបង្កឱ្យមានការភ្ញាក់ផ្អើល និងរិះគន់យ៉ាងខ្លាំង បន្ទាប់ពីលោកបានបង្ហោះរូបភាពក្រាហ្វិកមួយនៅលើបណ្ដាញសង្គម Truth Social បង្ហាញពីផែនទីប្រទេសវេណេហ្ស៊ុយអេឡា អមដោយរូបទង់ជាតិសហរដ្ឋអាម៉េរិក និងស្លាកសញ្ញាដែលសរសេរថា«រដ្ឋទី៥១»...។

ការបង្ហោះដ៏ចម្រូងចម្រាសនេះ កើតឡើងស្របពេលលោកកំពុងធ្វើដំណើរឆ្ពោះទៅកាន់ប្រទេសចិន ដើម្បីចូលរួមជំនួបកំពូលដ៏សំខាន់មួយ បន្ទាប់ពីលោកថ្លែងប្រាប់ទូរទស្សន៍ Fox News ថា លោកកំពុងពិចារណាបញ្ចូលប្រទេសដែលមានធនធានប្រេងដ៏សម្បូរបែបមួយនេះ ជាផ្នែកមួយនៃទឹកដីសហរដ្ឋអាម៉េរិក។ ជាការឆ្លើយតប ប្រធានាធិបតីបណ្ដោះអាសន្នរបស់វេណេហ្ស៊ុយអេឡា លោកស្រី ឌែលស៊ី រ៉ូឌ្រីហ្គេស (Delcy Rodriguez) បានច្រានចោលទាំងស្រុងចំពោះគំនិតនេះ ដោយលោកស្រីបានបញ្ជាក់ថា ប្រទេសវេណេហ្ស៊ុយអេឡា មិនដែលធ្លាប់គិតចង់ក្លាយជារដ្ឋទី៥១ របស់សហរដ្ឋអាម៉េរិកឡើយ បើទោះបីជាកងទ័ពសហរដ្ឋអាម៉េរិក បានចាប់ខ្លួនអតីតមេដឹកនាំផ្ដាច់ការ លោក នីកូឡាស ម៉ាឌូរ៉ូ (Nicolas Maduro) កាលពីខែមករាកន្លងទៅក៏ដោយ។

លោកស្រី ឌែលស៊ី រ៉ូឌ្រីហ្គេស លើកឡើងថា ទោះបីទំនាក់ទំនងរវាងប្រទេសទាំងពីរមានភាពល្អប្រសើរឡើងវិញ ក្រោមការដឹកនាំរបស់លោកស្រី តាមរយៈការកែទម្រង់បើកចំហវិស័យប្រេង និងរ៉ែដល់ក្រុមហ៊ុនបរទេស (ជាពិសេសក្រុមហ៊ុនអាម៉េរិក)ក៏ដោយ ក៏ជំហរនយោបាយរបស់លោកស្រី នៅតែរក្សាឯករាជ្យភាពជាតិ។ ទន្ទឹមនឹងនេះ ស្ថានភាពនយោបាយក្នុងស្រុករបស់វេណេហ្ស៊ុយអេឡានៅតែមានភាពតានតឹង ខណៈក្រុមប្រឆាំងបានទាមទារឱ្យមានការបោះឆ្នោតឡើងវិញបន្ទាន់។ ទោះជាយ៉ាងណា លោកស្រី រ៉ូឌ្រីហ្គេស មិនទាន់ផ្ដល់ចម្លើយច្បាស់លាស់អំពីពេលវេលានៃការបោះឆ្នោតនោះទេ ដោយគ្រាន់តែបញ្ជាក់យ៉ាងខ្លីថា វានឹងកើតឡើងនៅពេលណាមួយ នាពេលអនាគត។ សកម្មភាពរបស់ ត្រាំ នាពេលនេះ ត្រូវបានគេមើលឃើញថា ជាការបង្ហាញឥទ្ធិពល និងការគ្រប់គ្រងរបស់លោកលើប្រទេសវេណេហ្ស៊ុយអេឡា ដែលវាអាចនឹងធ្វើឱ្យប៉ះពាល់ដល់ស្ថិរភាពនៃទំនាក់ទំនងដែលកំពុងតែល្អប្រសើរឡើងវិញ រវាងរដ្ឋធានីវ៉ាស៊ីនតោន និងការ៉ាកាស។

សូមរំឭកផងដែរថា លោកប្រធានាធិបតីអាម៉េរិក ដូណាល់ ត្រាំ កាលពីថ្ងៃសុក្រទី៩មករា ឆ្នាំ២០២៦ ធ្លាប់បានអះអាងនៅថា សហរដ្ឋអាម៉េរិកចាំបាច់ត្រូវធ្វើជាម្ចាស់លើទឹកដីកោះហ្គ្រីនឡែន ឬហ្គ្រោអង់ឡង់ ដើម្បីជៀសវាងការកាន់កាប់ដោយប្រទេសរុស្ស៊ី ឬចិននាពេលអនាគត។ ភ្លាមៗ..បន្ទាប់ពីការប្រកាសអំពីផែនការចង់ក្រសោបយកកោះហ្គ្រីនឡែនរបស់ត្រាំ អង្គភាពណាតូ បានរិះរកវិធីសាស្ដ្រការពារសន្តិសុខនៅតំបន់អាកទិក ដោយបានបញ្ជូនយោធាទៅកាន់កោះទឹកកកនោះ ដើម្បីទប់ឥទ្ធិពលសហរដ្ឋអាម៉េរិក។ ឥឡូវនេះ លោក ត្រាំ បែរជាហ៊ានចាត់ទុកប្រទេសវេណេហ្ស៊ុយអេឡា ថាជារដ្ឋទី៥១របស់ខ្លួនថែមទៀត៕