ខេត្តស្វាយរៀង៖ សមត្ថកិច្ច បានកសាងសំណុំរឿងបញ្ចូនខ្លួនជនសង្ស័យជា ជនជាតិវៀតណាម២នាក់ និងខ្មែរម្នាក់ ដែលជួញដូរគ្រឿងញៀនជាង១គីឡូក្រាម ទៅសាលាដំបូងខេត្តស្វាយរៀង ដើម្បីចាត់ការតាមនីតិវិធីច្បាប់។ នេះបើតាមការឱ្យដឹងពី ស្នងការដ្ឋាននគរបាលខេត្តស្វាយរៀង។
នគរបាល បញ្ជាក់ថា កាលថ្ងៃទី៦ ខែឧសភា ឆ្នាំ២០២៦ កន្លងទៅ កម្លាំងនគរបាលនៃអធិការដ្ឋាននគរបាលស្រុកចន្ទ្រា បានឃាត់រថយន្ត១គ្រឿងស៊ីឈ្នួលដឹកគ្រឿងញៀនបើកបរដោយជនជាតិខ្មែរ រួចឃាត់ខ្លួនយកទៅសាកសួរ។ តាមរយៈចម្លើយសារភាពពីជនសង្ស័យរូបនេះ សមត្ថកិច្ចបានឈានទៅឃាត់ខ្លួនបក្ខពួក២នាក់ទៀតជាជនជាតិវៀណាម ដែលចាំទទួលគ្រឿងញៀន។
សមត្ថកិច្ច បានដកហូតវត្ថុតាង ដូចជា៖ គ្រឿងញៀនជាង១គីឡូក្រាម រថយន្ត១គ្រឿង ទូរសព្ទ៣គ្រឿង និងរបស់ប្រើប្រាស់មួយចំនួនទៀត។ សូមជម្រាបថា កាលពីចុងខែមេសា ឆ្នាំ២០២៦កន្លងទៅ កម្លាំងសមត្ថកិច្ចខេត្តស្វាយរៀងក៏បានឃាត់ខ្លួនជនសង្ស័យម្នាក់ ពាក់ព័ន្ធករណីជួញដូរគ្រឿងញៀន៨០កញ្ចប់ រួចក៏បានកសាងសំណុំរឿងបញ្ចូនទៅតុលាការផងដែរ៕
