រដ្ឋធានីហ្សាការតា៖ រដ្ឋមន្ត្រីការពារជាតិនៃប្រទេសឥណ្ឌូណេស៊ី និងជប៉ុន បានជួបចាប់ដៃគ្នានៅរដ្ឋធានីហ្សាការតា នៅថ្ងៃចន្ទទី៤ ខែឧសភា ដើម្បីចុះហត្ថលេខាលើកិច្ចព្រមព្រៀងសហប្រតិបត្តិការការពារជាតិ ក្នុងបំណងរក្សាសន្តិភាព និងស្ថិរភាពក្នុងតំបន់ ចំពេលពិភពលោកបច្ចុប្បន្នស្ថិតក្នុងភាពមិនប្រាកដប្រជា។

រដ្ឋមន្ត្រីការពារជាតិឥណ្ឌូណេស៊ី លោក ស្យាហ្វ្រី ស្យាមស៊ូឌីន (Sjafrie Sjamsoeddin) បានលើកឡើងថា លោកនឹងចុះហត្ថលេខាលើកិច្ចព្រមព្រៀងជាមួយសមភាគីជប៉ុន លោក ស៊ីនជីរ៉ូ កូអ៊ីហ្សូមី (Shinjiro Koizumi)។ ក្រសួងការពារជាតិជប៉ុន បានអះអាងថា លោក កូអ៊ីហ្សូមី មានបំណងពង្រឹងការផ្លាស់ប្ដូរក្នុងវិស័យបរិក្ខារការពារជាតិ និងបច្ចេកវិទ្យាយោធា។ គេនៅចាំបានថា កាលពីខែមុន រាជធានីតូក្យូ បានសម្រាលការរឹតត្បិតលើការនាំចេញអាវុធ ដែលអនុញ្ញាតឱ្យក្រុមហ៊ុនជប៉ុនអាចលក់អាវុធទៅឱ្យប្រទេសចំនួន១៧ ដែលមានកិច្ចព្រមព្រៀងការពារជាតិជាមួយជប៉ុន ក្នុងនោះរួមមានឥណ្ឌូណេស៊ីផងដែរ។

ប្រធានាធិបតីឥណ្ឌូណេស៊ី លោក ប្រាបូវ៉ូ ស៊ូបៀនតូ (Prabowo Subianto) បាននិងកំពុងជំរុញឱ្យមានការធ្វើទំនើបកម្មបរិក្ខាសឹកយោធាដ៏ចំណាស់របស់ប្រទេស ចាប់តាំងពីលោកកាន់អំណាចក្នុងឆ្នាំ២០២៤។ ទោះបីជាឥណ្ឌូណេស៊ីប្រកាន់ខ្ជាប់នូវគោលនយោបាយការបរទេសសេរី និងសកម្ម (មិនចូលបក្សសម្ព័ន្ធ)ក៏ដោយ ក៏កាលពីឆ្នាំមុន រដ្ឋធានីហ្សាការតាបានចូលរួមក្នុងក្រុមប្រ៊ីក(BRICS) ដែលមានរុស្ស៊ី និងចិនជាសមាជិក។ លោក ប្រាបូវ៉ូ ក៏បានចុះហត្ថលេខាលើកិច្ចព្រមព្រៀងពាណិជ្ជកម្មជាមួយប្រធានាធិបតីសហរដ្ឋអាម៉េរិក លោក ដូណាល់ ត្រាំ និងបានចូលរួមក្នុងក្រុមប្រឹក្សាសន្តិភាព (ឬBoard of Peace) របស់លោក ត្រាំ ផងដែរ។ សូមជម្រាបថា ឥណ្ឌូណេស៊ីមានទីតាំងយុទ្ធសាស្ត្រស្ថិតនៅច្រកសមុទ្ទម៉ាឡាកា ដែលជាផ្លូវទឹកដ៏មមាញឹកបំផុតរបស់ពិភពលោកសម្រាប់ការដឹកជញ្ជូនប្រេង។ គួរបញ្ជាក់ថា បរិមាណប្រេងដ៏ច្រើនលើសលប់ដែលឆ្ពោះទៅកាន់ប្រទេសចិន ត្រូវធ្វើដំណើរឆ្លងកាត់ច្រកសមុទ្ទដ៏រសើបមួយនេះ៕