សុខភាព៖ ក្រុមអាហារពណ៌បៃតង ពណ៌លឿង និងពណ៌ក្រហម មានគុណប្រយោជន៍ច្រើនណាស់ចំពោះរាងកាយ។ តស់! មកដឹងពីប្រភេទអាហារ ដែលស្ថិតនៅក្នុងក្រុមទាំង៣នេះ…។
១. ក្រុមអាហារពណ៌ក្រហម ជួយឱ្យរាងកាយលូតលាស់ ទ្រទ្រង់ ថែរក្សា ជួសជុលជាលិការបស់រាងកាយ ជួយបង្កើតសាច់ដុំ ឈាម និងឆ្អឹង។ អាហារក្រុមពណ៌ក្រហម មានដូចជា៖ សាច់គោ ជ្រូក មាន់ ថ្លើម មឹក បង្កង បង្គា កំពឹស ក្តាមខ្យង កង្កែប ត្រីងៀត ត្រីឆ្អើរ ស៊ុត សាច់ក្រក តៅហ៊ូ ទឹកសណ្តែក សណ្តែកសៀង សណ្តែកបាយ សណ្តែកដី។
២. ក្រុមអាហារពណ៌បៃតង ការពាររាងកាយ មានតួនាទីពង្រឹងមុខងាររបស់រាងកាយ និងការពាររាងកាយទប់ទល់ជំងឺ និងការបង្ករោគផ្សេងៗ។ អាហារក្រុមពណ៌បៃតង មានដូចជា៖ ល្ពៅ ប៉េងប៉ោះ ការ៉ុត ក្រូច ល្មុត សណ្តែកកួរ ស្ពៃក្តោប ឪឡឹក ត្របែក ននោង ត្រឡាច ត្រយូងចេក ខ្នុរ ចេក ត្រសក់ ត្រប់ ល្ហុង ម្នាស់ ត្រកួន ស្លឹកម្រុំ ស្លឹកបាស ត្រួយល្ពៅ។ល។
៣. ក្រុមអាហារពណ៌លឿង ផ្តល់កម្លាំងសម្រាប់ធ្វើសកម្មភាព។ អាហារទាំងនោះ រួមមាន៖ បាយ មី មីសួរ គុយទាវ អំបុក ពោត នំ ស្ករ ដំឡូងបារាំង ត្រាវ ដំបូងជ្វា ដំឡូងឈើ ប៉ិកួៈ អំពៅ ទឹកឃ្មុំ ប្រេងឆា ខ្លាញ់ ខ្ទិះដូង៕ អត្ថបទដកស្រង់៖ Hello គ្រូពេទ្យ
