សុខភាព៖ ចង់បានស្បែកស្រស់ភ្លឺថ្លា និងក្មេងជាងវ័យ ការថែទាំស្បែកខាងក្រៅមិនគ្រប់គ្រាន់ទេ គឺត្រូវការថែទំាពីខាងក្នុងរាងកាយដែរ។ ចំពោះរឿងនេះ លោកអ្នកកុំបារម្ភ ការថែទាំពីខាងក្នុង គ្រាន់តែទទួលទានអាហារទាំង៦ប្រភេទ ដែល SBM News បានរៀបរាប់ដូចខាងក្រោម នោះលោកអ្នកនាងនឹងទទួលបានស្បែកភ្លឺថ្លាមិនខាន…។
១.ការ៉ុត៖ ការ៉ុត ជាបន្លែមួយប្រភេទដែលសម្បូរទៅដោយបេតាការ៉ូទីន ដើរតួជាសារធាតុប្រឆាំងអុកស៊ីតកម្មនៅក្នុងខ្លួន ហើយអាចបង្កើតជាវីតាមីន A ជួយជួសជុល និងថែរក្សាស្បែកឱ្យមានសុខភាពល្អ។ ២.ផ្លែគីវី៖ មិនមែនមានតែផ្លែក្រូចទ្បើយដែលជាប្រភពនៃវីតាមីន C ជាក់ស្តែង ផ្លែគីវី ក៏មានវីតាមីនមួយនេះដែរ។ វីតាមីន C ជួយបង្កើតឱ្យមានប្រូតេអ៊ីន ខូឡាជែន ដែលជួយផ្ដល់ឱ្យស្បែកនូវភាពក្មេងជាងវ័យ រក្សាជាតិទឹក និងការពារពីភាពជ្រីវជ្រួញ។
៣.គ្រាប់រុក្ខជាតិ៖ គ្រាប់រុក្ខជាតិ អាចផ្ដល់ផលប្រយោជន៍ចំពោះសុខភាពស្បែក ព្រោះវាមានសារធាតុខ្លាញ់ជួយចិញ្ចឹមស្បែក។ តួយ៉ាង គ្រាប់ស្វាយចន្ទី ឬគ្រាប់វ៉លណាត់ ក៏សម្បូរទៅដោយវីតាមីន E ប្រឆាំងនឹងអុកស៊ីតកម្ម ប្រឆាំងការខូចខាតរ៉ាឌីកាល់ និងប្រឆាំងពីភាពចាស់។ ៤.ផ្លែប័រ៖ ផ្លែប័រ សម្បូរទៅដោយសារធាតុខ្លាញ់សំខាន់ៗ ដែលរាងកាយត្រូវការ ដើម្បីចិញ្ចឹមស្បែក សក់ និងជាប្រភពនៃវីតាមីន E អាចជួយការពារស្បែកពីភាពចាស់ និងការខូចខាតដោយសារពន្លឺព្រះអាទិត្យ។
៥.ត្រីសាល់ម៉ុន៖ ត្រីសាល់ម៉ុន សម្បូរទៅដោយអាស៊ីដខ្លាញ់អូមេហ្គា៣ ជួយកាត់បន្ថយការរលាក និងផ្ដល់សារធាតុចិញ្ចឹមចាំបាច់ដល់ស្បែក។ ដើម្បីទទួលបានអត្ថប្រយោជន៍លោកអ្នកគួរទទួលទាន យ៉ាងតិចពីរដងក្នុងមួយសប្ដាហ៍។ ៦.តែបៃតង៖ តែប្រភេទនីមួយៗមានសារធាតុប្រឆាំងអុកស៊ីតកម្មខុសៗគ្នា ប៉ុន្តែមានឥទ្ធិពលសម្រាប់ប្រឆាំងនឹងភាពចាស់ដូចគ្នា។ បើនិយាយពីតែបៃតង អាចជួយធ្វើឱ្យកោសិកាស្បែកលូតលាស់ឡើងវិញ៕ អត្ថបទដកស្រង់៖ Hello គ្រូពេទ្យ
