រាជធានីភ្នំពេញ៖ ជនល្មើស៣នាក់ ត្រូវបានកម្លាំងសមត្ថកិច្ចចាប់ខ្លួនជាបន្តបន្ទាប់ ក្រោយពួកគេធ្វើសកម្មភាពបង្ខាំងមនុស្ស និងជំរិតទាប្រាក់ពីនារីភេទទី៣ម្នាក់ កាលពីយប់រំលងអធ្រាត្រឈានចូលថ្ងៃទី៣០ ខែមេសា ឆ្នាំ២០២៦ ស្ថិតនៅសង្កាត់បឹងកេងកង៣ ខណ្ឌបឹងកេងកង រាជធានីភ្នំពេញ...។

លោកឧត្តមសេនីយ៍ឯក ជួន ណារិន្ទ ស្នងការនៃស្នងការដ្ឋាននគរបាលរាជធានីភ្នំពេញ បានឱ្យដឹងថា ដំបូងឡើយក្រុមជនល្មើសបានឆាតរកសេវាកម្មផ្លូវភេទ លុះពេលមកដល់ ស្រាប់តែពួកគេប្រើហិង្សាលើជនរងគ្រោះ ព្រមទាំងចាប់មនុស្សបង្ខាំង និងជំរិតទារប្រាក់ ចំនួន៨០០ដុល្លារ រួចរត់គេចខ្លួនចេញពីចំណុចកើតហេតុតែម្ដង។ យ៉ាងណា ក្រោយទទួលបានដំណឹងនេះ កម្លាំងការិយាល័យព្រហ្មទណ្ឌកម្រិតស្រាល បានបើកការស្រាវជ្រាវរហូតឈានដល់ការចាប់ខ្លួនអ្នកពាក់ព័ន្ធសរុប៣នាក់រួមមាន៖ ១.ឈ្មោះ ជិន ឡាងស៊ូ (Chen lang shu), ០២.ឈ្មោះ ហ្សៅ ហ្សុង (Xiao Xiong), ០៣.ឈ្មោះ ហាន លីង (Han Ling) ខណៈពួកគេទាំង៣នាក់សុទ្ធសឹងជាជនជាតិចិន។ 

ជាមួយគ្នា លោកឧត្តមសេនីយ៍ឯក ជួន ណារិន្ទ ក៏បានអំពាវនាវដល់អ្នកដែលជួបរឿងបែបនេះ ឱ្យមកដាក់ពាក្យបណ្ដឹងនៅការិយាល័យនគរបាលព្រហ្មទណ្ឌ ដើម្បីដាក់បន្ទុកលើជនសង្យ័យបន្ថែម ព្រោះថា សមត្ថកិច្ចជំនាញបានរកឃើញរូបភាពស្ត្រីរងគ្រោះជាច្រើននាក់ផ្សេងទៀតផងដែរ៕