រដ្ឋធានីព្យុងយ៉ាង៖ មេដឹកនាំកូរ៉េខាងជើង លោក គីម ជុងអ៊ុន (Kim Jong Un) បានពិភាក្សាអំពីស្ថានភាពនយោបាយអន្តរជាតិជាមួយរដ្ឋមន្ត្រីការពារជាតិរុស្ស៊ី ហើយបានលើកឡើងថា រដ្ឋធានីព្យុងយ៉ាងនឹងបន្តគាំទ្រគោលនយោបាយរបស់រុស្ស៊ីយ៉ាងពេញទំហឹង ជាពិសេសជុំវិញវិបត្តិសង្គ្រាមជាមួយអ៊ុយក្រែន។ នេះបើយោងតាមការចុះផ្សាយដោយប្រព័ន្ធផ្សព្វផ្សាយរដ្ឋ KCNA របស់កូរ៉េខាងជើង នៅថ្ងៃចន្ទទី២៧ ខែមេសា។

គណៈប្រតិភូរុស្ស៊ី ដឹកនាំដោយរដ្ឋមន្ត្រីការពារជាតិ លោក អាន់ដ្រេ ប៊េលូសូវ (Andrei Belousov) បានចូលរួមពិធីសម្ពោធវិមានអនុស្សាវរីយ៍ នៅកូរ៉េខាងជើង ដើម្បីផ្ដល់កិត្តិយសដល់ទាហានកូរ៉េខាងជើងដែលបានពលីក្នុងពេលប្រយុទ្ធគ្នានៅតំបន់ឃឺស (Kursk) ប្រទេសរុស្ស៊ី ជាទីកន្លែងដែលកងកម្លាំងអ៊ុយក្រែនបានវាយលុកចូលកាលពីឆ្នាំ២០២៤។ តាមរយៈលិខិតផ្ញើទៅកាន់ពិធីសម្ពោធវិមានអនុស្សាវរីយ៍នេះ ប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) បានលើកឡើងថា រុស្ស៊ី-កូរ៉េខាងជើង នឹងបន្តពង្រឹងភាពជាដៃគូយុទ្ធសាស្ត្រឱ្យកាន់តែរឹងមាំ។ ជាមួយគ្នានេះ លោក គីម ជុងអ៊ុន បានជូនពាក្យទៅរុស្ស៊ីវិញថា៖«រដ្ឋាភិបាលកូរ៉េខាងជើង នឹងបន្តគាំទ្រយ៉ាងពេញទំហឹងចំពោះគោលនយោបាយរបស់រុស្ស៊ី ក្នុងការការពារអធិបតេយ្យភាព បូរណភាពទឹកដី និងផលប្រយោជន៍សន្តិសុខរបស់ខ្លួន»។

សូមជម្រាបថា កូរ៉េខាងជើង បានបញ្ជូនកងទ័ពប្រហែល១៤០០០នាក់ ទៅជួយកងទ័ពរុស្ស៊ីក្នុងតំបន់ឃឺស បន្ទាប់ពីប្រទេសទាំង២នេះ បានព្រមព្រៀងលើសន្ធិសញ្ញាការពារគ្នាទៅវិញទៅមក។ យ៉ាងណា កូរ៉េខាងត្បូង អ៊ុយក្រែន និងលោកខាងលិច បានបញ្ជាក់ថា ទាហានកូរ៉េខាងជើងជាង៦០០០នាក់ ត្រូវបានសម្លាប់នៅក្នុងការប្រយុទ្ធគ្នា។ លោក គីម បានថ្លែងនៅវិមានអនុស្សាវរីយ៍នេះ កាលពីថ្ងៃអាទិត្យទី២៦ ខែមេសាថា៖«វិញ្ញាណក្ខន្ធរបស់អ្នកដែលបានស្លាប់ នឹងរស់នៅជាអមតៈជាមួយកិត្តិយសដ៏ខ្ពង់ខ្ពស់ដែលពួកគេបានពលី»៕