រាជធានីភ្នំពេញ៖ អតីតកូនដំរីឈ្មោះ «ឈូក» ដែលស្ទើរតែបាត់បង់ជីវិតដោយសារជាប់អន្ទាក់ព្រានក្នុងព្រៃជ្រៅ កាលពីកំលុងឆ្នាំ២០០៧ បច្ចុប្បន្ន កំពុងរស់នៅក្នុងសួនសត្វភ្នំតាម៉ៅ ទទួលបានជើងសិប្បនិម្មិតថ្មីមួយដែលជាព្រះរាជអំណោយរបស់សម្តេចហ្លួងម៉ែ ធ្វើឱ្យ ដំរី«ឈូក» អាចធ្វើដំណើរបានដោយក្ដីសង្ឃឹម...។

ដោយព្រះរាជហឫទ័យសណ្តោសប្រោសប្រណីដល់សត្វដំរីពិការឈ្មោះ «ឈូក» កាលពីថ្ងៃទី២៥ ខែមេសា ឆ្នាំ២០២៦ ម្សិលមិញ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ​ ក្នុងសេរីភាព​ សេចក្ដីថ្លៃថ្នូរ​ និងសុភមង្គល ជាទីគោរពសក្ការដ៏ខ្ពង់ខ្ពស់បំផុត ប្រោសព្រះរាជទាន ព្រះរាជទ្រព្យចំនួន ២០០០ដុល្លារ ដល់ក្រសួងកសិកម្ម រុក្ខាប្រមាញ់ និងនេសាទ ដើម្បីផលិតជើងសិប្បនិម្មិតថ្មីមួយ ជួយសម្រួលដល់ការដើររបស់សត្វដំរី«ឈូក» ឱ្យបានល្អប្រសើរឡើង។

សូមជម្រាបថា ព្រះរាជអំណោយរបស់សម្តេចហ្លួងម៉ែ ដល់ដំរី«ឈូក» នៅពេលនេះ ត្រូវបានអ្នកមើលថែ ឬហៅថាហ្មដំរី មានសេចក្ដីរំភើបរីករាយឥតឧបមា ដោយគាត់បានបញ្ជាក់ថា ការមើលថែ ដំរី«​ឈូក»​ ឱ្យមានសុខភាពល្អ និងមានលទ្ធភាពដើរបានធម្មតាវិញ គឺជាកិច្ចខំប្រឹងប្រែងរួមគ្នារវាង អគ្គនាយកដ្ឋានព្រៃឈើ និងសត្វព្រៃ នៃក្រសួងកសិកម្ម, អង្គការសម្ព័ន្ធមិត្តសត្វព្រៃ (Wildlife Alliance) និងអ្នកថែទាំដែលនៅជាប់ជាមួយ«ឈូក»ទាំងយប់ទាំងថ្ងៃ។ ជាមួយគ្នា លោកក៏បានអំពាវនាវដល់ប្រជាពលរដ្ឋខ្មែរទាំងអស់ សូមចូលរួមគាំទ្រកិច្ចការអភិរក្សសត្វព្រៃ និងការងារថែទាំសត្វនៅឧទ្យានជាតិភ្នំតាម៉ៅ ដើម្បីរួមចំណែករក្សាធនធានសត្វព្រៃនៅកម្ពុជាឱ្យបានគង់វង្សយូរអង្វែងដល់កូនខ្មែរជំនាន់បានឃើញ៕