ខេត្តកំពង់ធំ៖ ព្រៃឈើសហគមន៍អូរក្រញូងចំនួន៦ហិក ស្ថិតក្នុងឃុំមានរិទ្ធ ស្រុកសណ្តាន់ ខេត្តកំពង់ធំ រងការកាប់ទន្ទ្រាន។ លោកឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ អនុប្រធានអចិន្ត្រៃយ៍នៃគណៈកម្មការការពារ ទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ ចុះទៅពិនិត្យករណីនេះកាលពីថ្ងៃទី២៤ ខែមេសា ឆ្នាំ២០២៦...។
ប្រធានសហគមន៍ព្រៃឈើអូរក្រញូង លោក ម៉ៅ ធា រាយការណ៍លម្អិតថា ផ្ទៃដីសហគមន៍ព្រៃឈើអូរក្រញូងមានទំហំសរុបជាង១៦០០ហិកតា បច្ចុប្បន្ននៅសល់ប្រមាណជាង១២០០ហិកតា ដែលកំពុងគ្រប់គ្រងការពារ ចំណែកផ្ទៃដីព្រៃឈើជាង៤០០ហិកតាទៀត រងការកាប់ទន្រ្ទានយកធ្វើជាកម្មសិទ្ធិផ្ទាល់ខ្លួនពីសំណាក់ជនល្មើសមួយចំនួន ក្នុងរយៈពេលប៉ុន្មានឆ្នាំកន្លងទៅ។ ដោយឡែក លោក ហេង លីហួ នាយសង្កាត់រដ្ឋបាលព្រៃឈើសណ្តាន់ អះអាងថា ផ្ទៃដីព្រៃឈើសហគមន៍អូរក្រញូងដែលរងការកាប់ទន្ទ្រានក្នុងពេលត្រួតពិនិត្យនេះ មានទំហំជាង៩ហិកតា ហើយតាមការវាយតម្លៃផ្ទៃដីប្រមាណជាង៣ហិកតាត្រូវគេកាប់ទន្ទ្រាននៅក្នុងឱកាសបុណ្យចូលឆ្នាំថ្មីប្រពៃណីជាតិខ្មែរថ្មីៗនេះ។ ចំណែកផ្ទៃដីជាង៦ហិកតាទៀត អាចត្រូវក្រុមជនល្មើសលួចកាប់ទន្ទ្រាននាពេលប៉ុន្មានឆ្នាំកន្លងមកនេះ។
លោកឧត្តមសេនីយ៍ទោ សោម ស៊ុន បានសម្ដែងការសោកស្ដាយចំពោះការបាត់បង់ព្រៃឈើ ដែលយើងកំពុងការពារ និងអភិរក្ស សម្រាប់បម្រើសេចក្តីត្រូវការរបស់សង្គមជាតិ និងកូនចៅនៅជំនាន់ក្រោយ។ លោក សោម ស៊ុន ណែនាំឱ្យសមត្ថកិច្ចជំនាញ សហការជាមួយ ប្រធានសមាគមព្រៃឈើអូរក្រញូង ស្រាវជ្រាវវែករកមុខសញ្ញាកាប់ទន្ទ្រានព្រៃឈើសហគមន៍អូរក្រញូងឱ្យឃើញ ដើម្បីចាត់វិធានការតាមផ្លូវច្បាប់ ដោយគ្មានការលើកលែងឡើយ។ បន្ថែមលើនោះ លោកឧត្តមសេនីយ៍ទោ បញ្ជាឱ្យកងកម្លំាងប្រចាំនៅតំបន់ព្រៃសហគមន៍អូរក្រញូង ការពារដាច់ខាតកុំឱ្យមានការកាប់ទន្ទ្រានព្រៃឈើជាថ្មី និងត្រូវគ្រប់គ្រងឱ្យបានម៉ឺងម៉ាត់៕
