រាជធានីភ្នំពេញ៖ ​ ក្រុមការងារជំនាញអភិរក្សជលផលនៃក្រសួងកសិកម្ម និងមន្រ្តីពាក់ព័ន្ធ បានចុះលែង​កន្ធាយ​ក្បាលកង្កែប ដែលជាប្រភេទសត្វជិតផុតពូជសរុបចំនួន១៥ក្បាល ចូលទៅក្នុងដែនទឹកធម្មជាតិ ក្នុងឃុំបឹងចារ ស្រុកសំបូរ ខេត្តក្រចេះ។ នេះបើតាមការឱ្យដឹងពីក្រសួងកសិកម្ម...។

មន្ត្រីក្រសួងបានឱ្យដឹងថា លោកស្រី អ៊ឹម រចនា អនុរដ្ឋ​លេខា​ធិការក្រសួងកសិកម្ម និងលោក នេត្រ វិបុល នាយករងអង្គការអភិរក្សសត្វព្រៃ (WCS) បានដឹកនាំមន្ត្រីពាក់ព័ន្ធ អាជ្ញាធរ​ភូមិឃុំ និងតំណាងសហគមន៍មូលដ្ឋានមួយចំនួន ចុះទៅលែងសត្វកន្ធាយក្បាលកង្កែបដល់មូលដ្ឋាន។ ក្រសួងបញ្ជាក់ថា ​ សត្វកន្ធាយក្បាលកង្កែបនេះ ត្រូវបានចាត់ចំណាត់ថ្នាក់ជាប្រភេទជិតផុតពូជ ដោយបញ្ជីក្រហម របស់អង្គការ សហភាពអន្តរជាតិ ដើម្បីអភិរក្សធម្មជាតិ (IUCN) និងជាប្រភេទធនធានជលផលដែលកំពុងរងគ្រោះថ្នាក់នៅកម្ពុជា។ បច្ចុប្បន្ន កន្ធាយក្បាលកង្កែប ត្រូវបានបាត់បង់របាយរស់នៅក្នុងប្រទេសជាច្រើន ចំណែកប្រទេសកម្ពុជា តាមដងទន្លេមេគង្គក្នុងខេត្តក្រចេះ និងខេត្តស្ទឹងត្រែង គឺជារបាយរស់នៅតែមួយគត់ ដែលមានវត្តមានសត្វកន្ធាយក្បាលកង្កែបច្រើនជាងគេលើពិភពលោក។

ក្រសួងអះអាងថា ឆ្នាំ២០២៦នេះ សំបុកកន្ធាយ​ក្បាល​កង្កែបចំនួន១៤សំបុក ត្រូវ​បាន​​រកឃើញ និង​ការពារ។ ជាលទ្ធផល កូនកន្ធាយចំនួន១៩៥ក្បាល ត្រូវបានញាស់ដោយ​ជោគជ័យ និងមេពូជកន្ធាយក្បាលកង្កែប១ក្បាល ត្រូវបានជួយ​សង្គ្រោះ​​ ដោយនាំយកទៅថែទាំ និងតាមដាននៅមជ្ឈ​មណ្ឌលអភិរក្ស​សត្វល្មូនខេត្តកោះកុង។ នាឱកាសជំនួបជាមួយសហគមន៍ លោកស្រី អ៊ឹម រចនា បានថ្លែងអំណរគុណដល់​នាយក​​ដ្ឋានអភិរក្សជលផល នៃអគ្គនាយកដ្ឋានជលផល អង្គការ WCS ខណ្ឌរដ្ឋបាលជលផលក្រចេះ​ និង​ស្ទឹងត្រែង រួមនឹងសហគមន៍ ក្នុងបេសកកម្មអភិរក្ស​សត្វកំពុងរងគ្រោះជិតផុតពូជ។ ទន្ទឹមនោះ លោកស្រី លើកទឹកចិត្តឱ្យបន្តការងារនេះមានដូចជា៖ ការពារសំបុក ការអប់រំ និងការផ្សព្វផ្សាយ ការពង្រឹងការអនុវត្តច្បាប់ និងគម្រោង​លើក​​ស្ទួយ​ជីវភាព​ប្រជាសហគមន៍៕