រាជធានីបាងកក៖ ក្រុមប្រឹក្សាសន្តិសុខជាតិថៃ បានប្រកាសលុបចោលអនុស្សរណៈនៃការយោគយល់គ្នាឆ្នាំ២០០១ (ឬ MoU 44) ជាឯកតោភាគី ហើយប្តូរទៅប្រើក្របខណ្ឌច្បាប់សមុទ្ទ UNCLOS វិញ ខណៈសកម្មភាពដ៏គឃ្លើននេះ មិនត្រឹមតែជាការបំផ្លាញកិច្ចព្រមព្រៀងប៉ុណ្ណោះទេ ប៉ុន្តែថែមទាំងបានបង្ហាញពីផ្នត់គំនិតអាត្មានិយម ដែលថៃកំពុងប្រើដើម្បីដាក់សម្ពាធ និងចេតនាចង់ត្របាក់លេបដែនសមុទ្ទកម្ពុជា យ៉ាងកំរោលផងដែរ។  

រាជរដ្ឋាភិបាលថៃបានប្រកាសពីការលុបចោល MoU 44 តាមអំពើចិត្ត ដោយគ្មានសួរកម្ពុជាមួយម៉ាត់។ ភាគីថៃ ក៏បានប្រកាសថា នឹងយកបញ្ហានេះដាក់ជូនគណៈរដ្ឋមន្ត្រីដើម្បីសុំការអនុម័តចុងក្រោយ ខណៈប្រទេសមួយនេះ កំពុងផ្លាស់ប្ដូរវិធីសាស្ដ្រ ងាកទៅប្រើក្របខណ្ឌនៃអនុសញ្ញាអង្គការសហប្រជាជាតិ ស្តីពីច្បាប់សមុទ្ទ (ឬ UNCLOS) សម្រាប់ការចរចានៅពេលអនាគតជំនួសវិញ។ នាយករដ្ឋមន្ត្រីថៃ លោក អនុទីន ឆានវីរគុល បានថ្លែងបន្ទាប់ពីកិច្ចប្រជុំក្រុមប្រឹក្សាសន្តិសុខជាតិ (ឬ NSC) ថា NSC បានអនុម័តការលុបចោល MoU 44 ដែលជាការបញ្ចប់នីតិវិធីរបស់ក្រុមប្រឹក្សាសន្តិសុខជាតិ។ ជំហានបន្ទាប់ គឺក្រសួងការបរទេស នឹងដាក់បញ្ហានេះទៅកាន់គណៈរដ្ឋមន្ត្រី។ ទោះបីជាលោកមិនប្រាកដថា ដំណើរការនេះនឹងចំណាយពេលយូរប៉ុណ្ណាក៏ដោយ ប៉ុន្តែលោកថា វានឹងត្រូវធ្វើឡើងឱ្យបានលឿនបំផុតតាមដែលអាចធ្វើទៅបាន។ លើសពីនេះ លោកសង្កត់ធ្ងន់ថា MoU 44 គួរតែត្រូវលុបចោលភ្លាមៗ ដោយមិនចាំបាច់មានការពិនិត្យឡើងវិញ ឬពិគ្រោះយោបល់ជាមួយកម្ពុជានោះទេ។

មែនទែនទៅ ការដែលលោក អនុទីន ហ៊ានប្រកាសក្តែងៗថា ថៃអាចលុបចោល MoU 44 បានភ្លាមៗ ដោយមិនចាំបាច់ពិគ្រោះយោបល់ជាមួយភាគីកម្ពុជា គឺជាការបង្ហាញពីចរិតនយោបាយកោងកាច អាត្មានិយម និងមិនគោរពក្រមសីលធម៌អន្តរជាតិ។ កិច្ចព្រមព្រៀងដែលត្រូវបានចុះហត្ថលេខាដោយទ្វេភាគី មិនមែនជាក្រដាស-ស ដែលភាគីម្ខាងទៀតអាចហែកចោលតាមចិត្តចង់នោះឡើយ។ នេះស្តែងឱ្យឃើញថា ថៃកំពុងរំលោភកិច្ចព្រមព្រៀងអន្តរជាតិ និងដើរខ្សែលើកម្ពុជាយ៉ាងច្បាស់ក្រឡែត។ លើសពីនេះ ការដែលថៃងាកទៅប្រើក្របខណ្ឌច្បាប់សមុទ្ទ UNCLOS វិញ គ្រាន់តែជាល្បិចកលនយោបាយថ្មីមួយ ដើម្បីបង្វែរដាន និងបំភ័ន្តភ្នែកសហគមន៍អន្តរជាតិតែប៉ុណ្ណោះ។

យ៉ាងណា ថៃហាក់ដូចជាភ្លេចខ្លួនថា កម្ពុជានាពេលបច្ចុប្បន្នមិនមែនជាកម្ពុជាពីអតីតកាលឡើយ។ រាល់ការប៉ុនប៉ងរំលោភបំពានអធិបតេយ្យភាព និងលុបចោល MoU តាមអំពើចិត្ត ក្នុងបំណងលេបត្របាក់ដែនទឹក និងធនធានប្រេងកាតរបស់កម្ពុជា នឹងត្រូវប្រឈមមុខតាមផ្លូវច្បាប់អន្តរជាតិ ហើយកម្ពុជានឹងរក្សាសិទ្ធិគ្រប់យ៉ាងក្នុងការការពារផលប្រយោជន៍ជាតិ ចំពោះទង្វើគឃ្លើន និងអយុត្តិធម៌របស់ភាគីថៃ ដែលបានធ្វើនាពេលនេះ៕