រាជធានីភ្នំពេញ៖ ក្រោយទទួលបានលទ្ធផលផ្លែផ្កានៃកិច្ចសន្ទនា«២+២»លើកដំបូង រវាងមេដឹកនាំការទូត និងមេដឹកនាំការពារជាតិទ្វេភាគី កម្ពុជា-ចិន ឯកភាពដំឡើងកម្រិតកិច្ចសន្ទនាទៅជា«៣+៣» ដោយកម្ពុជាបានស្នើដាក់បញ្ចូលក្រសួងមហាផ្ទៃ រីឯភាគីចិន ដាក់ក្រសួងសន្តិសុខសាធារណៈបន្ថែម។ នេះបើយោងតាមសេចក្តីប្រកាសព័ត៌មាន ដែលចេញផ្សាយដោយក្រសួងការបរទេស និងសហប្រតិបត្តិការអន្តរជាតិ នៅថ្ងៃទី២៣ ខែមេសា ឆ្នាំ២០២៦…។

ក្នុងសេចក្តីប្រកាសលទ្ធផលនៃកិច្ចសន្ទនាយុទ្ធសាស្ត្រ«២+២»ដដែលនេះ ក្រសួងការបរទេសអះអាងថា កិច្ចសន្ទនាយុទ្ធសាស្ត្រ ២+២ រវាងលោកឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងលោកឧបនាយករដ្ឋមន្ត្រី ទៀ សីហា រដ្ឋមន្ត្រីការពារជាតិកម្ពុជា និងលោក វ៉ាង យី រដ្ឋមន្ត្រីការបរទេស និងលោក តុង ជុន រដ្ឋមន្ត្រីការពារជាតិចិន កាលពីថ្ងៃទី២២ ខែមេសា ឆ្នាំ២០២៦ បានឆ្លុះបញ្ចាំងពីទស្សនៈរួមរវាងប្រទេសទាំងពីរ លើបញ្ហានយោបាយ សន្តិសុខ សេដ្ឋកិច្ច ព្រមទាំងលើបញ្ហាតំបន់ និងអន្តរជាតិ។

តាមរយៈកិច្ចសន្ទនានោះ កម្ពុជា-ចិន បានសង្កត់ធ្ងន់លើសារសំខាន់នៃការរក្សាការផ្លាស់ប្ដូរទស្សនកិច្ចកម្រិតខ្ពស់, ការពង្រឹងទំនាក់ទំនងរវាងស្ថាប័ន និងការលើកកម្ពស់ការសម្របសម្រួលក្នុងចំណោមក្រសួង និងស្ថាប័ននៃប្រទេសទាំងពីរ។ ភាគីទាំងពីរក៏បានឯកភាពគ្នាថា យន្តការ«២+២» នេះ នឹងដើរតួនាទីជាវេទិកាដ៏សំខាន់មួយក្នុងការ ធ្វើឱ្យកាន់តែស៊ីជម្រៅនូវទំនាក់ទំនងជាយុទ្ធសាស្ត្រ បង្កើនការសម្របសម្រួលគោលនយោបាយ និងរួមគ្នាឆ្លើយតបចំពោះបញ្ហាប្រឈម ដែលកំពុងកើតមានឡើងទាំងក្នុងប្រទេសរៀងៗខ្លួន ក្នុងតំបន់ និងសកលលោក។

ក្នុងន័យនេះ កម្ពុជា-ចិន បានសម្រេចដំឡើងកិច្ចសន្ទនា ២+២ ទៅជា ៣+៣ ដោយមានការចូលរួមពីក្រសួងមហាផ្ទៃនៃព្រះរាជាណាចក្រកម្ពុជា និងក្រសួងសន្តិសុខសាធារណៈនៃសាធារណៈរដ្ឋប្រជាមានិតចិន ដើម្បីឆ្លើយតបនឹងការកើនឡើងនៃកិច្ចសហប្រតិបត្តិការទ្វេភាគី និងការវិវត្តនៃសភាពការណ៍តំបន់ និងអន្តរជាតិ។ ដោយឡែក ចំពោះទិសដៅពេលអនាគត កម្ពុជា-ចិន បានឯកភាពគ្នាធ្វើឱ្យកាន់តែស៊ីជម្រៅបន្ថែមទៀតនូវកិច្ចសហប្រតិបត្តិការជាក់ស្តែង ទាំងក្នុងវិស័យជាប្រពៃណី និងវិស័យថ្មីៗ ដែលមានសក្តានុពល។

ក្នុងនោះរួមមាន៖ បរិវត្តកម្មឌីជីថល ការអភិវឌ្ឍបៃតង សេដ្ឋកិច្ចពណ៌ខៀវ ការតភ្ជាប់ ខ្សែច្រវាក់ផ្គត់ផ្គង់ដែលមានភាពធន់ កិច្ចសហប្រតិបត្តិការហិរញ្ញវត្ថុ និងការផ្លាស់ប្ដូរប្រជាជននិងប្រជាជន។ ទន្ទឹមគ្នា ក្នុងបរិបទនេះ ភាគីទាំងពីរបានបញ្ជាក់សាជាថ្មីនូវការប្តេជ្ញាចិត្ត ជំរុញក្របខ័ណ្ឌកិច្ចសហប្រតិបត្តិការសំខាន់ៗ រួមមាន៖ ក្របខ័ណ្ឌ កិច្ចសហប្រតិបត្តិការត្បូងពេជ្រ ច្រករបៀងឧស្សាហកម្មនិងបច្ចេកវិទ្យា ច្រករបៀងមច្ឆានិងអង្ករ ដែលនឹងបន្តជំរុញឱ្យមានលទ្ធផលជាក់ស្តែង និងមានផលប្រយោជន៍ទៅវិញទៅមកសម្រាប់ប្រទេសនិងប្រជាជនទាំងពីរ៕