ក្រុងសំរោង៖ ករណីអគ្គិភ័យស្ថិត នៅភូមិអូរជញ្ជៀន ឃុំអន្លង់វែង ស្រុកអន្លង់វែង ខេត្តឧត្ដរមានជ័យ បានឆក់យកជីវិតមនុស្សម្នាក់ ខណៈផ្ទះដល់ទៅ៣ខ្នង បានរងការខូចខាត។ នេះបើតាមការឱ្យដឹងពីនាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ នៃអគ្គស្នងការដ្ឋាននគរបាលជាតិ។
នាយកដ្ឋាននគរបាលបង្ការពន្លត់អគ្គិភ័យ និងសង្រ្គោះ បានឱ្យដឹងថា អគ្គិភ័យ ស្ថិតនៅស្រុកអន្លង់វែង ខេត្តឧត្ដរមានជ័យនេះ បានកើតឡើងកាលពីម៉ោងប្រមាណ៤:៣០នាទីទៀបភ្លឺ ថ្ងៃទី១៦មេសា ឆ្នាំ២០២៦ បណ្ដាលមកពីទុស្សេខ្សែភ្លើង។ បន្ទាប់ពីទទួលបានព័ត៌មានភ្លាមៗ លោក ខូវ លី ស្នងការនគរបាលខេត្តឧត្តរមានជ័យ បានដឹកនាំកម្លាំង និងចេញរថយន្តពន្លត់អគ្គិភ័យសរុបចំនួន៤គ្រឿង ចុះទៅកាន់កន្លែងកើតហេតុ ជួយអន្ដរាគមន៍បាញ់ទឹកពន្លត់ ដោយប្រើប្រាស់ទឹកអស់ចំនួន១៨រថយន្ត និងរ៉ឺម៉កដឹកទឹកចំនួន៥គ្រឿង ទើបអាចពន្លត់ឱ្យរលត់បានទាំងស្រុង នៅម៉ោងប្រមាណ៧:៤០នាទីព្រឹក ថ្ងៃទី១៦មេសា ដដែល។
ក្រោយពន្លត់បាន នាយកដ្ឋាននគរបាលបង្ការពន្លត់អគ្គិភ័យ វាយតម្លៃថា អគ្គិភ័យបានបណ្ដាលឱ្យស្លាប់មនុស្សម្នាក់ និងឆេះខូចខាតផ្ទះចំនួន៣ខ្នង។ ក្នុងនោះ ផ្ទះទី១ មានទំហំ១៦ម៉ែត្រគុណ៨០ម៉ែត្រ សាងសង់ថ្មប្រក់ក្បឿង ត្រូវបានរងការខូចខាតមួយចំនួន និងសម្ភារប្រើប្រាស់មួយចំនួនដែរ។ រីឯម្ចាស់ផ្ទះទី២ មានផ្ទះទំហំ ៧ម៉ែត្រគុណ៨០ម៉ែត្រ សាងសង់ពី ឈើលើ ថ្មក្រោម ដំបូលប្រក់ក្បឿង លាយស័ង្កសី បានរងការខូចខាតទាំងស្រុង និងផ្ទះទី៣ មានទំហំ ៨ម៉ែត្រគុណ៨០ម៉ែត្រ សាងសង់ពី ឈើលើថ្មក្រោម ដំបូលប្រក់ក្បឿង លាយស័ង្កសី៕
