ខេត្តព្រៃវែង៖ បុរសជាប្ដីបានតាមទាន់ឃើញប្រពន្ធខ្លួន នៅជាមួយបុរសផ្សេង ក៏ផ្ទុះកំហឹងទប់មិនជាប់ ហើយប្រើកាំបិតចាក់ទៅលើបុរសជាជនទី៣នោះ បណ្ដាលឱ្យបាត់បង់ជីវិតក្នុងថ្លុកឈាម ខណៈស្ត្រីជាប្រពន្ធខ្លួនរងរបួសធ្ងន់ ត្រូវបានបញ្ជូនទៅកាន់មន្ទីរពេទ្យភ្លាមៗ ដើម្បីជួយសង្គ្រោះ។ ហេតុការណ៍នេះ កើតឡើងកាលពីយប់រំលងអធ្រាត្រឈានចូលថ្ងៃទី១៤ ខែមេសា ឆ្នាំ២០២៦ ស្ថិតក្នុងឃុំកន្សោមអក ស្រុកកំពង់ត្របែក ខេត្តព្រៃវែង។
សមត្ថកិច្ចបានចុះទៅកាន់ទីតាំងកើតហេតុភ្លាមៗ ដើម្បីត្រួតពិនិត្យ និងនាំខ្លួនបុរសជាប្ដីដើម ទៅសាកសួរ។ នៅចំពោះមុខសមត្ថកិច្ច បុរសជាប្ដីដើម បានរៀបរាប់ថា ខ្លួនសង្ស័យប្រពន្ធក្បត់លួចមានអ្នកថ្មីជាយូរមកហើយ តែមិនទាន់ចាប់បានភស្តុតាង។ លុះមកដល់យប់កើតហេតុ ពេលខ្លួនភ្ញាក់ពីដេក ប្រុងទៅបត់ជើងតូច ស្រាប់តែបាត់ប្រពន្ធមិនឃើញនៅក្នុងបន្ទប់ ទើបចេញដើររក ហើយក៏ឃើញកំពុងនៅនែបនិត្យជាមួយបុរសផ្សេងនៅខាងក្រោយផ្ទះ។ បុរសជាប្ដីដើម បន្តថា ដោយសារទប់កំហឹងមិនបាន ខ្លួនក៏យកកូនកាំបិតចាក់ពួកគេទាំងពីរនាក់តែម្ដង។ បច្ចុប្បន្ន បុរសជាប្តីដើម ត្រូវសមត្ថកិច្ចជំនាញកសាងសំណុំរឿងបញ្ជូនទៅតុលាការ ដើម្បីចាត់ការតាមនិតីវិធី៕
