រាជធានីភ្នំពេញ៖ កម្ពុជា តាមរយៈក្រសួងវប្បធម៌ បានប្រកាសតវ៉ាយ៉ាងមុតមាំ និងយ៉ាងដាច់អហង្ការចំពោះការកាន់កាប់ដោយខុសច្បាប់របស់កងកម្លាំងប្រដាប់អាវុធថៃ មកលើប្រាសាទតាមាន់ធំ ប្រាសាទតាក្របី ប្រាសាទខ្នារ និងតំបន់ផ្សេងៗទៀត ស្ថិតក្នុងដែនអធិបតេយ្យភាពរបស់កម្ពុជា។ 

ក្នុងសេចក្តីថ្លែងការណ៍ចេញនៅយប់ថ្ងៃ១៣ ខែមេសា ឆ្នាំ២០២៦ ក្រសួងវប្បធម៌ បង្ហាញក្តីព្រួយបារម្ភយ៉ាងខ្លាំង ចំពោះវត្តមាន និងសកម្មភាពរបស់អាជ្ញាធរថៃ ដែលសាងសង់ហេដ្ឋារចនាសម្ព័ន្ធនានា រួមមាន ផ្លូវ និងការដំឡើងរូបសំណាកជាបន្តបន្ទាប់។ ក្រសួងវប្បធម៌ បន្តថា ជាការរៀបចំដំណើរទស្សនកិច្ចជាសាធារណៈ និងសកម្មភាពផ្សេងៗនៅតំបន់ទាំងនេះ ក៏បានបង្ហាញពីការប្រើប្រាស់អំណាច និងការគ្រប់គ្រងដោយខុសច្បាប់លើដែនដីកម្ពុជាផងដែរ។

ក្រសួងវប្បធម៌ ហៅសកម្មភាពទាំងនេះរបស់ភាគីថៃ ថាជាការរំលោភបំពានលើអធិបតេយ្យភាព និងបូរណភាពទឹកដីកម្ពុជា។ ជាមួយគ្នា ក្រសួងវប្បធម៌ ថែមទាំងទាញយកឯកសារអន្តរជាតិជាច្រើនមកបង្ហាញឱ្យថៃបើកភ្នែកមើលផងដែរថា សកម្មភាពទាំងអស់ខាលើ គឺជាការរំលោភបំពានយ៉ាងធ្ងន់ធ្ងរលើសន្ធិសញ្ញាបារាំង–សៀមឆ្នាំ១៩០៧, ផែនទីព្រំដែនបង្កើតឡើងដោយគណៈកម្មការកំណត់ព្រំដែនរវាងឥណ្ឌូចិន និងសៀម, អនុស្សរណៈយោគយល់ឆ្នាំ២០០០, លក្ខខណ្ឌយោងឆ្នាំ២០០៣, ធម្មនុញ្ញអង្គការសហប្រជាជាតិ, និងអនុសញ្ញាទីក្រុងឡាអេឆ្នាំ១៩៥៤ ជាដើម។

ក្រសួងវប្បធម៌ អំពាវនាវឱ្យរាជរដ្ឋាភិបាលថៃ បញ្ឈប់ជាបន្ទាន់នូវសកម្មភាពទាំងនេះ ព្រមទាំងដកកងកម្លាំងប្រដាប់អាវុធ ភ្នាក់ងារ និងឧបករណ៍ទាំងអស់ចេញពីតំបន់ប្រាសាទ និងទីតាំងនានារបស់កម្ពុជា។ ក្រសួងវប្បធម៌ អះអាងថា កម្ពុជា នៅតែបន្តប្តេជ្ញាចិត្តក្នុងការដោះស្រាយវិវាទដោយសន្តិវិធី ហើយអំពាវនាវឱ្យភាគីថៃចូលរួមអនុវត្តកិច្ចព្រមព្រៀង និងច្បាប់អន្តរជាតិដែលមានស្រាប់៕