សុខភាព៖ មិនមែនទាល់តែផលិតផលថែរក្សាសម្រស់ថ្លៃៗ បានធ្វើឱ្យស្បែកស្រស់ថ្លា និងក្មេងជាងវ័យទេ។ ជាក់ស្តែង ម៉ាសធម្មជាតិធ្វើពីផ្លែឈើ៤មុខដែល SBM News រៀបរាប់ខាងក្រោម នារីៗអាចសាកល្បងធ្វើបាន ព្រោះចំណាយតិចហើយបានស្អាតដូចប្រើផលិតផលដែលមានលក់លើទីផ្សារ…។
១.ម៉ាសធ្វើពីផ្លែគីវី៖ ក្នុងផ្លែគីវីមានផ្ទុកសារធាតុប្រឆាំងនឹងអុកស៊ីតកម្ម វីតាមីន C និងវីតាមីន E។ សារធាតុប្រឆាំងនឹងអុកស៊ីតកម្ម ជួយបន្សាបលំហូររ៉ាឌីកាល់សេរី រីឯវីតាមីន C និងវីតាមីន E ជួយធ្វើឱ្យស្បែកក្មេងជាងវ័យ។ លើសពីនេះ ជួយការពារស្បែកពីកាំរស្មី UV ក៏ដូចជាបង្កើនការផលិតខូឡាជែន ដែលពន្យឺតការវិលទៅរកភាពចាស់។ វិធីធ្វើ៖ យកសាច់ ឬទឹកគីវី លាយជាមួយប្រេងអូលីវចំនួន២ទៅ៣ស្លាបព្រាកាហ្វេ។ បន្ទាប់មកលាបលើផ្ទៃមុខ ហើយម៉ាស្សាជារាងរង្វង់ចុះឡើង រួចលាងជម្រះជាមួយទឹកត្រជាក់ហើយជាការស្រេច។
២.ម៉ាសធ្វើពីពពួកផ្លែបឺរី៖ ពពួកផ្លែបឺរីមាន ដូចជាស្រ្តបឺរី ឈើរី ប្លូបឺរី មានសារធាតុប្រឆាំងនឹងអុកស៊ីតកម្ម មានគុណប្រយោជន៍ជួយកម្ចាត់ជាតិពុល ជួយកម្ចាត់បញ្ហាមុន និងភាពកខ្វក់ចេញពីស្បែក។ មួយវិញទៀត ផ្លែឈើទាំងនេះ ក៏អាចជួយធ្វើឱ្យស្បែកភ្លឺថ្លាដែរ។ វិធីធ្វើ៖ កាត់ជាចំណិតរួចត្រដុសថ្នមៗនៅលើផ្ទៃមុខ បន្ទាប់មកលាងជម្រះចេញជាមួយនឹងទឹកធម្មតា ឬកិនឱ្យម៉ត់លាយជាមួយទឹកកឃ្មុំចំនួន១ស្លាបព្រា ហើយលាបលើផ្ទៃមុខឱ្យសព្វល្អ រួចលាងជម្រះចេញជាមួយទឹក។
៣.ម៉ាសផ្លែប័រ៖ ផ្លែប័រស្រស់ អាចជួយសង្គ្រោះស្បែកពីបញ្ហាស្បែករបក និងស្ងួត រយៈពេលយូរឆ្នាំបានយ៉ាងពូកែ ព្រោះផ្លែប័រសម្បូរទៅដោយប្រេងធម្មជាតិ សារធាតុប្រឆាំងនឹងអុកស៊ីតកម្ម និងសារធាតុរ៉ែ ដែលអាចជ្រាបចូលទៅក្នុងស្បែកយ៉ាងជ្រៅ ដើម្បីផ្ដល់ជាតិទឹក និងសំណើមដល់ស្បែក ធ្វើឱ្យស្បែកក្មេងជាងវ័យ។ វិធីធ្វើ៖ កិនផ្លែប័រចំនួន១ផ្លែ ដោយឆ្កៀលយកគ្រាប់ចេញ បន្ទាប់មកលាយជាមួយទឹកឃ្មុំ និងទឹកក្រូចឆ្មារចំនួន១ស្លាបព្រាកាហ្វេ។ កូរឱ្យសព្វល្អរួចយកមកលាបលើផ្ទៃមុខ ទុកចោលរយៈពេល១៥នាទីហើយ លាងជម្រះចេញជាមួយកក្ដៅឧណ្ហៗ។
៤.ម៉ាសផ្លែក្រូច៖ ផ្លែក្រូចមានផ្ទុកសារធាតុរំញោច ជួយបន្តឹង និងសម្អាតស្បែកបានស្អាតល្អ។ លើសពីនេះ អាចកាត់បន្ថយជាតិពណ៌ ស្លាកស្នាម និងស្នាមមុខ។ ជាពិសេស ម៉ាសទឹកក្រូច អាចជួយកម្ចាត់មុនក្បាលខ្មៅ ដែលកកើតឡើងនៅពេលខ្លាញ់ និងកោសិកាងាប់ៗនៃស្បែកលាយបញ្ចូលគ្នា ធ្វើឱ្យរន្ធញើសកកស្ទះ។ វិធីធ្វើ៖ លាយទឹកក្រូច ចំនួន២ស្លាបព្រា និងទឹកក្រូចឆ្មារ ចំនួន១ស្លាបព្រាកាហ្វេ បន្ទាប់មកលាបនៅលើផ្ទៃមុខ និងបរិវេណ-កទុករយៈពេល២០នាទី បន្ទាប់មកលាងចេញជាមួយទឹកត្រជាក់៕ អត្ថបទដកស្រង់៖ Hello គ្រូពេទ្យ
