សុខភាព៖ ឈាមរត់មិនល្អ អាចបង្កឡើងដោយបញ្ហាមួយចំនួនដូចជា ជំងឺសរសៃអាកទែរ ជំងឺទឹកនោមផ្អែម ការជក់បារី ។ល។ នៅពេលចរន្តឈាមត្រូវបានកាត់បន្ថយ អាចបង្ករោគសញ្ញាមួយចំនួនដូចជា ការឈឺចាប់ រមួលក្រពើ ស្ពឹក បញ្ហាប្រព័ន្ធរំលាយអាហារ និងត្រជាក់ចុងដៃ ចុងជើង។ ទោះបីជាបញ្ហាចរន្តឈាមត្រូវព្យាបាលដោយការប្រើថ្នាំ តែការទទួលទានអាហារ៧ប្រភេទដូចដែលបានរៀបរាប់ខាងក្រោម អាចជួយចរន្តឈាមឱ្យដើរល្អទ្បើងវិញ…។
១.ម្ទេស៖ ម្ទេសមានសារធាតុខាប់សៃសិន (capsaicin)។ សារធាតុនេះ ជួយឱ្យចរន្តឈាមរត់ទៅកាន់ជាលិកាបានល្អ បញ្ចុះសម្ពាធឈាម និងជំរុញការផលិតនីឌ្រិចអុកស៊ីត (nitric oxide) ដែលអាចពង្រីកសរសៃឈាមបាន។ ការស្រាវជ្រាវបានបង្ហាញថា ការទទួលទានម្ទេសបង្កើនចរន្តឈាម ពង្រឹងសរសៃឈាម និងបន្ថយការកកស្ទះនៅសរសៃអាកទែរ។ ២.រមៀត៖ ការទទួលទានរមៀត គឺជួយបង្កើនចរន្តឈាម។ តាមការសិក្សាបានឱ្យដឹងថា សារធាតុមាននៅក្នុងរមៀតឈ្មោះ ខូរឃ្យូមិន (curcumin) ជួយបង្កើនការផលិតនីឌ្រិចអុកស៊ីត បន្ថយការរលាក និងបន្ថយភាពតានតឹងនៃអុកស៊ីតកម្ម។ ៣.មើមខ្ញី៖ ខ្ញីអាចបញ្ចុះសម្ពាធឈាម និងបង្កើនចរន្តឈាម។ ក្នុងការសិក្សាលើមនុស្សជាច្រើន បង្ហាញថា ខ្ញីអាចបញ្ចុះសម្ពាធឈាមដែលអាចបង្កផលប៉ះពាល់អវិជ្ជមានទៅលើរំហូរឈាម។
៤.ខ្ទឹមស៖ ខ្ទឹម-ស មានប្រយោជន៍ដល់ចរន្តឈាម និងសុខភាពបេះដូង។ ការសិក្សាជាច្រើន អះអាងថា សារធាតុស្ពាន់ធ័រ និងសារធាតុអាល់លីស៊ីន ក្នុងខ្ទឹម-ស អាចបង្កើនចរន្តឈាមទៅកាន់ជាលិកា និងបញ្ចុះសម្ពាធឈាម ដោយជួយសម្រួលសរសៃឈាម។ ៥.ខ្ទឹមបារាំង៖ ខ្ទឹមបារាំង ជាប្រភពដ៏ល្អសម្រាប់សារធាតុប្រឆាំងអុកស៊ីតកម្ម ដែលមានប្រយោជន៍ដល់សុខភាពបេះដូង។ បន្លែនេះជួយចរន្តឈាមដោយពង្រីកសរសៃអាកទែរ និងសរសៃវ៉ែន។ ម៉្យាងទៀត ខ្ទឹមបារាំង ក៏មានប្រសិទ្ធភាពក្នុងការប្រឆាំងការរលាកដែលអាចបង្កើនចរន្តឈាម ល្អសម្រាប់បេះដូង កាត់បន្ថយការរលាកនៅសរសៃវ៉ែន និងសរសៃអាកទែរ។
៦.ពពួកផ្លែក្រូច៖ ការបរិភោគផ្លែឈើសម្បូរទៅដោយសារធាតុហ្វាវ័រនយ (flavonoids) និងសារធាតុប្រឆាំងអុកស៊ីតកម្ម នឹងជួយបន្ថយការរលាកនៅក្នុងរាងកាយ បញ្ចុះសម្ពាធឈាម និងការឡើងរឹងនៃសរសៃអាកទែរ បង្កើនរំហូរឈាម ការផលិតនីឌ្រិចអុកស៊ីត និងបន្ថយហានិភ័យជំងឺគ្រោះថ្នាក់សរសៃឈាមក្នុងខួរក្បាល។ សារធាតុនេះ ជាក់ស្តែងមាននៅក្នុង ក្រូចថ្លុង ផ្លែក្រូច និងក្រូចឆ្មារ។ ៧.ផ្លែទទឹម៖ ផ្លែទទឹម សម្បូរសារធាតុប្រឆាំងអុកស៊ីតកម្ម ប៉ូលីហ្វេណុល (polyphenol) និងនីដ្រាត (nitrates) ជួយដល់ការពង្រីកសរសៃឈាម។ ការទទួលទាន ផ្លែទទឹម ឬផឹកទឹកទទឹម អាចជួយដល់ចរន្តឈាមឱ្យមានភាពប្រសើរឡើង និងបញ្ជូនអុកស៊ីសែន ទៅកាន់ជាលិកាសាច់ដុំ ដែលអាចជួយដល់ការធ្វើសកម្មភាពផ្សេងៗ។
សូមជម្រាបថា ក្រៅពីអាហារដែលបានរៀបរាប់ខាងលើ ការផ្លាស់ប្ដូរបរិបទនៃការរស់នៅប្រចាំថ្ងៃ ក៏អាចជួយដល់ចរន្តឈាមដែរដូចជា ពិសារទឹកឱ្យបានគ្រប់គ្រាន់ កាត់បន្ថយស្ត្រេស ឈប់ជក់បារី និងសម្រកទម្ងន់៕ អត្ថបទដកស្រង់ពី៖ Hello គ្រូពេទ្យ
