សុខភាព៖ នារីៗភាគច្រើនគិតផ្ដោតសំខាន់តែលើការថែទាំស្បែកពីខាងក្រៅ ដូចជា ការជ្រើសរើសផលិតផលថែទាំស្បែកល្អៗ ជម្រុះកោសិកាចាស់ៗ និងម៉ាស្សាមុខ ដើម្បីឱ្យស្បែកស្អាត។ ការគិតបែបនេះ មិនទាន់ធ្វើឱ្យស្បែកស្អាតពេញលេញទេ គួរតែទទួលអាហារមួយចំនួនដែលមានសារធាតុចិញ្ចឹមល្អៗ ទើបជួយឱ្យស្បែកភ្លឺថ្លាចេញពីខាងក្នុង…។
អាហារដែលជួយឱ្យស្បែកភ្លឺចេញពីខាងក្នុង មានដូចជា៖ ១.ខ្លាញ់អូមេហ្គា៣៖ នៅក្នុង ត្រីសាល់ម៉ុន ត្រីសាឌីន និងត្រីធូណា មានខ្លាញ់អូមេហ្គា៣ វាអាចជួយឱ្យឆ្អឹងមានសុខភាពល្អ ជួយគ្រប់គ្រងការផលិតប្រេងនៃស្បែក ការពារខួរក្បាល កាត់បន្ថយការឈឺចាប់ពេលមករដូវ កាត់បន្ថយការរលាកដោយផ្ទាល់ និងកាត់បន្ថយហានិភ័យនៃជំងឺបេះដូង។ លើសពីនេះ ពពួកខ្លាញ់អូមេហ្គា៣ ក៏ជួយឱ្យមានសុខភាពល្អ ធ្វើឱ្យស្បែកភ្លឺថ្លា ទន់រលោង និងការពារការកើតមុនដែរ។ សូមរំលេចបន្តិចថា ត្រីសាល់ម៉ុន ត្រីសាឌីន និងត្រីធូណា មិនត្រឹមតែមានឱជារសឆ្ងាញ់ជាប់ចិត្តប៉ុណ្ណោះទេ ប៉ុន្តែប្រភេទត្រីទាំងបីមុខនេះ ក៏មានសារធាតុ ខ្លាញ់អូមេហ្គា៣ ជួយឱ្យកោសិកាស្បែកលោកអ្នកទទួលបានឋាមពលរឹមមាំផងដែរ។
២.វីតាមីន C៖ វីតាមីន C មានសមត្ថភាពខ្ពស់ក្នុងការកាត់បន្ថយភាពចាស់នៃស្បែក និងមានតួនាទីផលិតខូឡាជែន។ បន្ថែមពីនេះ វីតាមីនមួយប្រភេទនេះ ក៏ជួយព្យាបាលការបំផ្លាញស្បែកដោយកម្ដៅថ្ងៃផងដែរ។ ដូច្នេះ គួរទទួលទានទឹកក្រូចស្រស់ នៅពេលព្រឹកព្រលឹមទើបជាការប្រសើរ ម្យ៉ាងវិញទៀត ត្រូវបរិភោគអាហារដែលផ្ទុកវីតាមីន C ជាប្រចាំ ដើម្បីពង្រឹងប្រព័ន្ធភាពស៊ាំ និងជួយស្បែកឱ្យមានសុខភាពល្អ។ អាហារដែលសម្បូរទៅដោយវីតាមីនC មានដូចជា ពពួកផ្លែក្រូច និងស្រ្តបឺរី។
៣.វីតាមីន D៖ ដើម្បីបំពេញមុខងារបានត្រឹមត្រូវ រាងកាយត្រូវការវីតាមីន និងសារធាតុរ៉ែជាច្រើនប្រភេទ។ វីតាមីនដ៏សំខាន់បំផុតមួយសម្រាប់រាងកាយ គឺវីតាមីន D ជាវីតាមីនមានសារសំខាន់បំផុត សម្រាប់មុខងារជីវសាស្ត្រ។ វីតាមីន D មានមុខងារប្រឆាំងនឹងអុកស៊ីតកម្ម និងជួយបង្ការបញ្ហាចាស់មុនវ័យ។ ចំពោះអាហារដែលសម្បូរទៅដោយវីតាមីន D មានដូចជា ទឹកដោះគោ ស៊ុតផ្នែកពណ៌លឿង និងផ្សិត៕ អត្ថបទដកស្រង់៖ Hello គ្រូពេទ្យ
