រាជធានីភ្នំពេញ៖ ក្រោយមានការចែកចាយលើបណ្ដាញសង្គម អំពីរូបភាពបុរសឈ្មោះ ឡុង ច័ន្ទវិបុល ប្រើកាំភ្លើងវែង បាញ់សម្លាប់សត្វស្លាប ជាប្រភេទសត្វដែលត្រូវអភិរក្ស ហើយត្រូវមហាជនរិះគន់យ៉ាងខ្លាំងនោះ ពេលនេះ សមត្ថកិច្ចជំនាញ បានហៅបុគ្គលរូបនោះ ទៅសាកសួរហើយ។ សត្វដែលបុរសនោះបាញ់ គឺជាសត្វក្រសារ និងទាព្រៃ។ 

លោក ខ្វៃ អាទិត្យា អ្នកនាំពាក្យក្រសួងបរិស្ថាន បានប្រាប់អង្គភាពសារព័ត៌មាន ​SBM News តាមតេឡេក្រាម នៅរសៀលថ្ងៃទី៨ ខែមេសា ឆ្នាំ២០២៦នេះ ថា មន្រ្តីជំនាញ បានហៅបុគ្គលឈ្មោះ ឡុង ច័ន្ទវិបុល ដែលថៅកែគ្រឿងចក្រ ទៅសាកសួរ។ អ្នកនាំពាក្យបញ្ជាក់ដូច្នេះថា៖«[មន្រ្តី]ខាងក្រោម គឺយើងកំពុងចាត់វិធានការតាមនីតិវិធី..ឥឡូវនេះ អាជ្ញាធរ បានអញ្ជើញគាត់ទៅពិនិត្យរួចហើយ»។ 

មន្ត្រីនៃមន្ទីរបរិស្ថានរាជធានីភ្នំពេញ បានបើកការស្រាវជ្រាវ រហូតចុះទៅដល់លំនៅឋានរបស់បុគ្គលឈ្មោះ ឡុង ច័ន្ទវិបុល ស្ថិតនៅបុរីវិមានភ្នំពេញ សង្កាត់ជ្រោយចង្វា ខណ្ឌជ្រោយចង្វា។ ពេលអាជ្ញាធរចុះទៅដល់ បុរសនោះ មិននៅផ្ទះនោះទេ ហើយសមត្ថកិច្ចបានណែនាំសាមីខ្លួនតាមទូរសព្ទ ដោយតម្រូវឱ្យទៅបង្ហាញខ្លួននៅចំពោះមុខអាជ្ញាធរមានសមត្ថកិច្ច៕