រាជធានីភ្នំពេញ៖ ក្រសួងការបរទេសកម្ពុជា បានប្រកាសថា យោធា និងមន្រ្តីថៃ នៅតែបន្តសកម្មភាពរំលោភលើអធិបតេយ្យភាពកម្ពុជា ដោយនាំពលរដ្ឋខ្លួនទៅផ្ទៀងផ្ទាត់[ដើម្បីទទួល]កម្មសិទ្ធិដីធ្លីនៅភូមិជោគជ័យ ហើយបន្តទៅរាយបន្លាលួសបន្ថែមនៅច្រកអូរស្មាច់ ខេត្តបន្ទាយមានជ័យ។ 

បើតាមសេចក្តីប្រកាសព័ត៌មានរបស់ក្រសួងការបរទេស ចេញនៅយប់ថ្ងៃទី៣មេសា ឆ្នាំ២០២៦ បានបញ្ជាក់ថា នៅចន្លោះថ្ងៃទី៣១មីនា ដល់ថ្ងៃទី២មេសា ឆ្នាំ២០២៦ កងកម្លាំងបូព៌ាថៃ បានដឹកនាំពលរដ្ឋថៃមួយក្រុម ធ្វើសកម្មភាពផ្ទៀងផ្ទាត់កម្មសិទ្ធិដីធ្លី តាមបណ្តោយព្រំដែនចន្លោះបង្គោលព្រំដែនលេខ៤៥ និង៤៧ នៅតំបន់ភូមិជោគជ័យ ខេត្តបន្ទាយមានជ័យ។ ក្រសួងចាត់ទុកសកម្មភាពនាំពលរដ្ឋខ្លួនទៅមើលដីនៅភូមិជោគជ័យនេះ គឺជាការប៉ុនប៉ងខុសច្បាប់របស់ថៃ ដើម្បីបង្កើតការកាន់កាប់លើដីជាក់ស្តែង និងការ សម្រេចទុកជាមុននូវលទ្ធផលនៃការងារកំណត់ខណ្ឌសីមាព្រំដែនដែលកំពុងអនុវត្តដោយគណៈកម្មការចម្រុះខណ្ឌសីមាព្រំដែនគោក (JBC) នៃប្រទេសទាំងពីរ។

ដោយឡែក នៅថ្ងៃទី២មេសា ឆ្នាំ២០២៦ ក្រសួងអះអាងថា​៖«កងកម្លាំងទ័ពថៃប្រមាណ៧០នាក់ អមដោយរថពាសដែកចំនួន២គ្រឿង ត្រូវបានដាក់ពង្រាយនៅច្រកទ្វារអន្តរជាតិអូរស្មាច់ ក្រុងសំរោង ខេត្តឧត្តរមានជ័យ ប្រទេសកម្ពុជា ដោយពួកគេបានបន្តដាក់ពង្រាយលួសបន្លាបន្ថែម»។ នៅថ្ងៃនោះដដែល កងកម្លាំងប្រដាប់អាវុធថៃ បានដាក់ពង្រាយគ្រឿងចក្រធុនធ្ងន់ ធ្វើសកម្មភាពឈូសឆាយដី នៅជិតបង្គោលព្រំដែនលេខ២ ក្នុងស្រុកអន្លង់វែង ខេត្តឧត្តរមានជ័យ។ ក្រសួងតវ៉ាយ៉ាងដាច់ខាតទៅនឹងសកម្មភាពទាំងនេះ និងមិនអាចចាត់ទុកថាជាសកម្មភាពការពារខ្លួនទេ ហើយក៏មិនអាចចាត់ទុកថា ជាការអនុវត្តតាមសេចក្តីប្រកាសរួមនៃកិច្ចប្រជុំពិសេសសលើកទី៣របស់គណៈកម្មាធិការព្រំដែនទូទៅ (GBC)។

ក្រសួងគូសបញ្ជាក់ថា សកម្មភាពទាំងនោះ គឺផ្ទុយយ៉ាងច្បាស់ទៅនឹងវិធានការបន្ថយភាពតានតឹង ដែលបានចែងនៅក្នុងសេចក្តីប្រកាសរួម នាថ្ងៃទី២៧ ខែធ្នូ ឆ្នាំ២០២៥ ព្រមទាំងកាតព្វកិច្ច និងការប្តេជ្ញាចិត្តរបស់ថៃក្រោមកិច្ចព្រមព្រៀងនានា ដែលមានស្រាប់រវាងប្រទេសទាំងពីរ។ ក្រសួងអះអាងថា រាជរដ្ឋាភិបាលកម្ពុជា មិនទទួលស្គាល់ ឬទទួលយកខ្សែបន្ទាត់ព្រំដែន ឬការទាមទារដែនដីណាមួយ ដែលថៃបានប្រកាសដោយឯកតោភាគីឡើយ៕