រាជធានីភ្នំពេញ៖ ដើម្បីការពារទឹកដី និងប្រជាពលរដ្ឋ មួយរយៈនេះ វីរកងទ័ពកម្ពុជាពិតជាហត់នឿយណាស់ ក្នុងការទប់ទល់ចំពោះការឈ្លានពានពីសំណាក់យោធាថៃ។ ការជម្នះឧបសគ្គ និងការលំបាកយ៉ាងច្រើននេះ បានធ្វើឱ្យកងទ័ពកម្ពុជាកាន់តែមានភាពខ្លាំងក្លា និងរឹងមាំជាងមុន។ នេះជាការមើលឃើញរបស់លោកឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ ដែលលោករំលេចឡើងតាមរយៈសារផ្ញើជូនកងទ័ពទាំងអស់ ក្នុងពិធីបុណ្យចូលឆ្នាំថ្មីប្រពៃណីជាតិ។

លោករដ្ឋមន្ត្រីការពារជាតិ បានវាយតម្លៃខ្ពស់ចំពោះសមិទ្ធផលយ៉ាងធំធេង ដែលកងទ័ពសម្រេចបានកន្លងមក គឺកើតចេញពីការលះបង់ ខិតខំពុះពារជម្នះគ្រប់ឧបសគ្គ និងការលំបាកនានា ប្រកបដោយភាពអង់អាចក្លាហាន មោះមុត ជាមួយការប្តេជ្ញាចិត្តខ្ពស់។ លោករដ្ឋមន្ត្រី បញ្ជាក់យ៉ាងដូច្នេះថា៖«ការពុះពារជម្នះបានគ្រប់ឧបសគ្គទាំងអស់នេះ បានធ្វើឱ្យកងយោធពលខេមរភូមិន្ទ កាន់តែរឹងមាំ កាន់តែមានភាពខ្លាំងក្លា មានសមត្ថភាពគ្រប់គ្រាន់ក្នុងការការពារអធិបតេយ្យជាតិ និងបូរណភាព ទឹកដីរបស់ខ្លួន។ ជាបទពិសោធកន្លងមកនេះ ក្រោមស្មារតីជាតិខ្មែរតែមួយ យើងបានរួបរួមសាមគ្គីពួតដៃគ្នាទប់ស្កាត់ការឈ្លានពានពីប្រទេសជិតខាង មកលើដែនអធិបតេយ្យភាពរបស់យើង»៕