រដ្ឋធានីវ៉ាស៊ីនតោន៖ បន្ទាប់ពីប្រើប្រាស់ហេតុផលការពារសន្តិសុខសកល និងការទប់ស្កាត់អាវុធនុយក្លេអ៊ែរដើម្បីវាយប្រហារលើអ៊ីរ៉ង់អស់រយៈពេលមួយខែមក ពេលនេះលោកប្រធានាធិបតីអាម៉េរិក ដូណាល់ ត្រាំ បានទម្លាយមហិច្ឆតាពិតប្រាកដរបស់លោក គឺការចង់ចូលគ្រប់គ្រងធនធានប្រេងដ៏មហាសាលរបស់ប្រទេសនេះ...។

នៅក្នុងកិច្ចសម្ភាសជាមួយកាសែត Financial Times កាលពីថ្ងៃទី២៩មីនា លោក ត្រាំ បានបង្ហាញបំណងចង់វាយយកកោះខាក (Kharg) ដែលជាមជ្ឈមណ្ឌលនាំចេញប្រេងដ៏ធំបំផុតរបស់អ៊ីរ៉ង់។ លោកប្រៀបធៀបយុទ្ធសាស្ត្រនេះ ទៅនឹងប្រតិបត្តិការនៅវេណេហ្ស៊ុយអេឡា កាលពីខែមករា ដែលអាម៉េរិកចាប់ខ្លួនលោក នីកូឡាស ម៉ាឌូរ៉ូ (Nicolás Maduro) និងរៀបចំផែនការគ្រប់គ្រងឧស្សាហកម្មប្រេងនៅទីនោះ។ លោក ត្រាំ បាននិយាយឥតលាក់លៀមថា៖«និយាយ​ឱ្យ​ត្រង់​ទៅ អ្វីដែលខ្ញុំចង់បានបំផុត គឺការគ្រប់គ្រងប្រេងនៅក្នុងប្រទេសអ៊ីរ៉ង់ ប៉ុន្តែ​មនុស្ស​ល្ងង់​មួយ​ចំនួន​នៅ​សហរដ្ឋ​អាម៉េរិក​និយាយ​ថា ហេតុអ្វី​បាន​ជា​អ្នក​ធ្វើ​បែប​នេះ? ប៉ុន្តែ​ពួកគេ​គឺជា​មនុស្ស​ល្ងង់!»។ នៅពេលសាកសួរអំពីការការពាររបស់អ៊ីរ៉ង់នៅលើកោះខាក ដែលជាមូលដ្ឋានទ័ពជើងទឹកដ៏សំខាន់របស់អ៊ីរ៉ង់ លោក ត្រាំ បានបង្ហាញនូវទំនុកចិត្តខ្ពស់ថា វាជារឿងងាយស្រួលបំផុត ដោយសារលោកយល់ថា ប្រព័ន្ធការពាររបស់អ៊ីរ៉ង់នៅទីនោះមិនមានសមត្ថភាពទប់ទល់បានឡើយ។

ចំណែក ឯខាងភាគីអ៊ីរ៉ង់វិញ ប្រធានសភា លោក ម៉ូហាម៉ាត់ បាកឺ កាលីបាហ្វ (Mohammad Baqer Qalibaf) បានឆ្លើយតបទៅវិញដោយព្រមានថា កងទ័ពអ៊ីរ៉ង់ កំពុងរង់ចាំស្វាគមន៍ទាហានសហរដ្ឋអាម៉េរិក ដែលឈានជើងចូលមកក្នុងសមរភូមិជើងគោក។ ការបង្ហើបពីបំណងចង់បានប្រេងនេះ កើតឡើងចំពេលតម្លៃប្រេងឆៅប្រភេទ Brent ហក់ឡើងលើសពី១១៥ដុល្លារក្នុងមួយបារ៉ែល ជាកម្រិតខ្ពស់បំផុតចាប់តាំងពីសង្រ្គាមផ្ទុះឡើង។ ស្របពេលជាមួយគ្នា កងទ័ពអាម៉េរិក រួមទាំងកងពលធំឆត្រយោងលេខ៨២ កំពុងប្រមូលផ្ដុំគ្នានៅតំបន់ឈូងសមុទ្ទពែរ្ស ជាសញ្ញាបង្ហាញពីការត្រៀមលក្ខណៈសម្រាប់ប្រតិបត្តិការជើងគោកលើកោះខាក បើទោះបីជាអ៊ីរ៉ង់បានព្រមានវាយបកវិញយ៉ាងចាស់ដៃក៏ដោយ៕