ខេត្តក្រចេះ៖ មន្ទីរធម្មការ និងសាសនាខេត្តក្រចេះ សហការជាមួយសមត្ថកិច្ច ឃាត់ខ្លួនសង្ឃក្លែងក្លាយ១៤រូប ពេលបម្រុងចូលក្នុងពិធីរាប់បាត្រក្នុងព្រឹត្តិការណ៍បុណ្យទន្លេ លើកទី១០ នៅព្រឹកថ្ងៃទី២៨ ខែមិនានេះ។ ក្រោយឃាត់ខ្លួន សមត្ថកិច្ច បានយកពួកគេទៅអប់រំណែនាំ និងតម្រូវឱ្យធ្វើកិច្ចសន្យាឈប់ប្រព្រឹត្តអំពើខុសឆ្គងនេះតទៀត។ 

អ្នកដែលដឹងមុនគេ គឺលោក ស៊ូ សែ ប្រធានមន្ទីរធម្មការ និងសាសនាខេត្តក្រចេះ។ លោក លើកឡើងថា ពេលឃើញសង្ឃក្លែងក្លាយទាំង១៤រូបនោះ ប្រុងចូលក្នុងពិធីបិណ្ឌបាត្រ លោក ក៏សង្ស័យ​ ហើយក៏បានហៅមកសួរនាំ។ ជាលទ្ធផល ពិតជារកឃើញភាពមិនប្រក្រតីមែន ហើយក្នុងនាមថ្នាក់ដឹកនាំមន្ទីរជំនាញ លោកបានសហការជាមួយសមត្ថកិច្ច ដើម្បីនាំយកពួកគេទៅសួរនាំបន្ថែម។ នៅចំពោះមុខសមត្ថកិច្ច ពួកគេ បានឆ្លើយសារភាពថា ពិតជាបានក្លែងបន្លំជាព្រះសង្ឃ ដើម្បីរកលុយ៕

រាយការណ៍ដោយ លោក សារី ណែត ទីភ្នាក់ងារ SBM News ប្រចាំខេត្តក្រចេះ