រាជធានីភ្នំពេញ៖ នៅទីបំផុត ឃាតកដែលចាក់សម្លាប់បុរសវ័យចំណាស់ជាម្ចាស់ផ្ទះជួល ត្រូវសមត្ថកិច្ចចាប់ខ្លួនបានហើយ នៅយប់ពាក់កណ្តាលអធ្រាត្រថ្ងៃ២៧មីនា ក្រោយគេចខ្លួនបាន១ថ្ងៃ ពីរាជធានីភ្នំពេញ ទៅដល់ខេត្តរតនគិរី។ បុរសជាអ្នកជួលបន្ទប់ ប្រព្រឹត្តអំពើឃាតកម្ម ព្រោះខឹងបុរសវ័យចំណាស់ជាម្ចាស់បន្ទប់ជួល ស្ដីបន្ទោសរឿងផឹកស៊ីរំំខានគេ។ អំពើឃាតកម្មនេះ កើតឡើងនៅភូមិព្រែកតានូ១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ កាលពីថ្ងៃ២៦មីនា។  

ក្រោយទទួលបានសេចក្ដីរាយការណ៍ថា មានឃាតកម្មបង្កដោយជនសង្ស័យឈ្មោះ ហុក វីរៈ បណ្ដាលឱ្យជនរងគ្រោះឈ្មោះ ងិន ធីរ៉ា ស្លាប់ក្នុងថ្លុកឈាម ភ្លាមៗ លោកឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ បានចាត់កម្លាំងជំនាញ បើកការអង្កេតស្រាវជ្រាវ បន្តសហការជាមួយស្នងការដ្ឋាននគរបាលខេត្តរតនគិរី រហូតឃាត់ខ្លួនបានជនសង្ស័យខាងលើ។ 

​នៅចំពោះមុខសមត្ថកិច្ច ជនល្មើសបានសារភាពថា ពិតជាបានសម្លាប់ជនរងគ្រោះមែន ហើយមូលហេតុ ដោយសារតែខឹងជនរងគ្រោះ ហាមឃាត់កុំឱ្យខ្លួនស្រែកឡូឡាពេករាល់ពេលផឹកស៊ី។ បច្ចុប្បន្ន ជនល្មើសជាឃាតក ត្រូវបានបញ្ជូនខ្លួនទៅកាន់នាយកដ្ឋាននគរបាលព្រហ្មទណ្ឌ ដើម្បីបន្តនីតិវិធី៕