សុខភាព៖ ជាមធ្យម រាងកាយត្រូវការសារធាតុជាតិសរសៃចន្លោះពី២៥-៣០ក្រាមក្នុងមួយថ្ងៃ បើលោកអ្នកទទួលទនខ្វះ នោះនឹងនាំឱ្យទល់លាមក ប៉ុន្តែបើទទួលទានច្រើនពេក លើសការកំណត់ គឺអាចនាំឱ្យហើម និងចុកពោះ...។
ទាំងនេះជាអាហារ ដែលដោះស្រាយបញ្ហាទល់លាមក រួមមាន៖ ១.គ្រាប់សណ្ដែក៖ សណ្ដែកស្ថិតនៅក្នុងក្រុមអាហារដែលមានជាតិសរសៃខ្ពស់បំផុត។ នៅពេលទទួលទាន សណ្ដែកមួយពែង នឹងអាចទទួលបានជាតិសរសៃរហូតដល់ទៅ១០ក្រាម។ ប្រភេទសណ្ដែកទាំងនោះ មានដូចជា សណ្ដែកសៀង សណ្ដែកក្រហម សណ្ដែកហ្គាបានហ្ស៊ូ (Garbanzo beans) សណ្ដែកលីម៉ា ឬសណ្ដែកពីនតូ។ ២.ដំឡូងជ្វា៖ ដំឡូងមានសារធាតុសរសៃខ្ពស់ ប៉ុន្តែភាគច្រើនស្ថិតនៅលើសម្បក។ ដំឡូងជ្វាស្ងោរជាមួយសម្បកទំហំល្មមមួយ អាចផ្ដល់ឱ្យសារធាតុសរសៃដល់ទៅ៣,៨ក្រាម។ ដំឡូងផ្សេងទៀតក៏ល្អដែរ សម្រាប់បញ្ហាទល់លាមក ដោយដំឡូងតូចល្មម អាចមានជាតិសរសៃដល់ទៅ៣ក្រាម។
៣.ផ្លែគីវី៖ ផ្លែគីវី មានជាតិស្ករទាបណាស់ ធ្វើឱ្យកាត់បន្ថយការហើមពោះ។ លើសពីនេះ មានជាតិសរសៃ និងមានជីវជាតិល្អៗសម្រាប់សុខភាពផ្សេងទៀត ដូចជាវីតាមីន C ជាដើម។ ៤.ផ្លែសារី ផ្លែផ្លាំ និងផ្លែប៉ោម៖ ផ្លែឈើ៣មុខនេះ មានជាតិសរសៃផ្តល់ទៅរាងកាយស្រដៀងគ្នាចន្លោះពី៥-៦ក្រាម ក្នុងមួយផ្លែ។ក្រៅពីនេះ ពពួកផ្លែប៊្លែកបឺរី ឬផ្លែស្ត្រប់បឺរី ក៏សម្បូរដោយជាតិសរសៃដែរ។ ៥.ពោតលីង (Popcorn)៖ ពោតលីង ជាអាហារដែលផ្ដល់សុខភាព និងងាយស្រួលទទួលបានសារធាតុសរសៃ បើសិនជាអត់ដាក់អំបិល ឬប័រចូល។ គ្រាប់ពោត ជាគ្រាប់ធញ្ញជាតិអាចការពារ ឬកាត់បន្ថយបញ្ហាទល់លាមក បើព្យាយាមបរិភោគឱ្យបានច្រើន៕ អត្ថបទដកស្រង់៖ Hello គ្រូពេទ្យ
