សុខភាព៖ ស្បែកអាចផ្ទុកជាតិពុល ដោយសាររបបអាហារ និងបរិស្ថាន។ ដូច្នេះ បើចង់បន្សាបជាតិពុលចេញពីស្បែក គួរសាកវិធីដែលបានរៀបរាប់ដូចខាងក្រោម។
១. គេងឱ្យបានគ្រប់គ្រាន់៖ គេងឱ្យគ្រប់៨ម៉ោង នឹងអាចបំពេញថាមពលដល់រាងកាយ ។ បើចង់គេងឱ្យបានគ្រប់គ្រាន់ ត្រូវកាត់បន្ថយស្រ្តេស ព្រោះបើគេងមិនលក់អាចបណ្ដាលឱ្យចាល់អាស៊ីដ។ ២. ហាមងូតទឹកក្ដៅរាល់ថ្ងៃ៖ ការងូតទឹកក្ដៅខ្លាំងពេក អាចរំខានដល់កម្រិត pH (ភីអេច) ហើយវាក៏អាចធ្វើឱ្យស្បែកមានបញ្ហាជាច្រើន ។ លើសពីនេះ ការងូតទឹកក្ដៅ ក៏ធ្វើឱ្យរាងកាយកើតមុនដែរ។ ៣. រក្សាជាតិទឹកដល់ស្បែកគ្រប់ពេល៖ វិធីដ៏ល្អបំផុតក្នុងការបន្សាបជាតិពុល និងធានាថាជាតិពុលទាំងនោះ ត្រូវបានបណ្ដេញចេញពីស្បែក គឺត្រូវពិសាទឹកឱ្យបានច្រើន។ កត្តានេះក៏អាចជួយរក្សាអនាម័យមាត់ធ្មេញ ក៏ដូចជារក្សាតុល្យភាពកម្រិត pH នៃរាងកាយទាំងមូល។ អាចបន្ថែមក្រូចឆ្មារ ឬត្រសក់ពីរបីចំណិតទៅក្នុងដបទឹក ដើម្បីបន្ថែមរសជាតិស្រាល និងផ្ដល់វីតាមីនល្អៗ ដែលអាចជួយក្នុងដំណើរការបន្សាបជាតិពុលកាន់តែប្រសើរថែមទៀត។
៤. ធ្វើលំហាត់ប្រាណ៖ ការហាត់ប្រាណអាចជួយបណ្តេញជាតិពុល។ ជាក់ស្ដែងនៅពេលដែលបែកញើស កំលុងពេលធ្វើលំហាត់ប្រាណ ជាតិពុល និងភាពកខ្វក់ ក៏ត្រូវបណ្ដេញចេញមកក្រៅដែរ។ ៥. កាត់បន្ថយការទទួលទានគ្រឿងស្រវឹង និងកុំជក់បារី៖ ការពិសារគ្រឿងស្រវឹង និងជក់បារី ជះឥទ្ធិពលមិនល្អដល់សុខភាព។ គ្រឿងស្រវឹងអាចនាំឱ្យស្បែកខ្សោះជាតិទឹកយ៉ាងឆាប់រហ័ស ស្បែកចាប់ផ្ដើមស្ងួត និងហត់នឿយ។ ចំណែកការជក់បារី ក៏អាចបំផ្លាញខូឡាជែន និងភាពយឺតនៃស្បែក ដែលជាហេតុពន្លឿនភាពចាស់មុនវ័យ។ ៦. របបអាហារមានតុល្យភាព៖ ដើម្បីជួយឱ្យស្បែកអាចទប់ទល់ និងកម្ចាត់ជាតិពុលបានត្រូវការវីតាមីន និងសារធាតុរ៉ែសំខាន់ៗជាចាំបាច់។ ការទទួលទានអាហារមានតុល្យភាព អាចជួយឱ្យរាងកាយមានសុខភាពល្អ និងអាចបណ្ដេញសារធាតុពុល ក៏ដូចជាសម្បូរទៅដោយសារធាតុចិញ្ចឹមត្រឹមត្រូវ។
៧. លាងសម្អាតស្បែកឱ្យបានត្រឹមត្រូវ៖ ការលាងសម្អាតផ្ទៃមុខ និងស្បែកដងខ្លួន ជារឿងសំខាន់មួយ បន្ទាប់ពីក្រោកពីគេង។ ការធ្វើបែបនេះ អាចជម្រះរាល់ធូលី ឬជាតិកខ្វក់ផ្សេងៗដែលអាចតោងជាប់ ពេលគេង។ ដូច្នេះហើយ ស្បែកត្រូវការសម្អាតនៅពេលព្រឹកជាចាំបាច់៕
