សុខភាព៖ នៅពេលអាកាសធាតុក្ដៅខ្លាំង រាងកាយត្រូវការបំពេញជាតិទឹកឱ្យបានគ្រប់គ្រាន់ ព្រោះបើក្នុងខ្លួនមិនមានជាតិទឹកគ្រប់តម្រូវការទេ អាចធ្វើឱ្យលោកអ្នកនាងជួបនូវហេតុការណ៍មួយចំនួនដូចជា៖ ហត់ ឈឺក្បាល រមួលក្រពើ និងសម្ពាធឈាមទាប។ ការពិសាទឹកគ្រប់គ្រាន់ គឺសំខាន់ណាស់ ប៉ុន្តែក៏អាចបំពេញជាតិទឹកតាមរយៈអាហារ ឬផ្លែឈើមួយចំនួនដែរ។ ខាងក្រោមនេះ ជាបន្លែ-ផ្លែឈើ ដែលអាចជួយបំពេញជាតិទឹកដល់រាងកាយទាំង១១មុខ ដែលអង្គភាពសារព័ត៌មាន SBM News នឹងលម្អិតជូន...។
១.ផ្លែត្រសក់៖ ត្រសក់មានជាតិទឹក៩៥ភាគរយ និងមានសារធាតុចិញ្ចឹមដូចជា វីតាមីនK ប៉ូតាស្យូម និងម៉ាញ៉េស្យូម។ លើសពីនេះ ផ្លែត្រសក់ ក៏មានកាឡូរីទាប ដែលអាចជួយរក្សាទម្ងន់បានយ៉ាងមានប្រសិទ្ធភាព។ ២.ផ្លែប៉េងប៉ោះ៖ ផ្លែប៉េងប៉ោះ មានជាតិទឹក ៩៤ភាគរយ ផ្តល់នូវវីតាមីន និងរ៉ែផ្សេងៗដូចជា វីតាមីន A និងC។ ផ្លែប៉េងប៉ោះ ១៤៩ក្រាម ផ្តល់កាឡូរី៣២។ ផ្លែប៉េងប៉ោះ ក៏មានជាតិសរសៃ និងសារធាតុប្រឆាំងអុកស៊ីតកម្ម លីកូពីន អាចកាត់បន្ថយហានិភ័យជំងឺបេះដូង និងការពារជំងឺមហារីកក្រពេញប្រូស្តាត។ ៣.ស្ពៃក្ដោប៖ ស្ពៃក្ដោបមានជាតិទឹក៩២ភាគរយ សម្បូរទៅដោយសារធាតុហ្វូឡាត ជាតិសរសៃ វីតាមីនC វីតាមីនK និងសារធាតុរ៉ែផ្សេងៗ ដែលមានប្រយោជន៍ដល់សុខភាព។ ចំពោះសារធាតុប្រឆាំងអុកស៊ីតកម្មក្នុងស្ពៃក្ដោប ក៏អាចការពារជំងឺមហារីកសួតផងដែរ។
៤.ផ្កាខាត់ណា៖ ផ្កាខាត់ណា មានផ្ទុកជាតិទឹក៩២ភាគរយ ជាតិសរសៃ៣ក្រាម និង២៥កាឡូរី។ មួយវិញទៀត ផ្កាខាត់ណា ក៏មានសារធាតុខូលីន ដែលជាសារធាតុចិញ្ចឹមចាំបាច់សម្រាប់ទ្រទ្រង់សុខភាព ខួរក្បាល និងការធ្វើមេតាបូលីស។ ៥.ម្ទេសប្លោក៖ ម្ទេសប្លោកមានជាតិទឹក៩២ភាគរយ ក៏ដូចជាសម្បូរដោយជាតិសរសៃ វីតាមីនB វីតាមីនC ប៉ូតាស្យូម និងសារធាតុប្រឆាំងអុកស៊ីតកម្ម ដែលអាចកាត់បន្ថយហានិភ័យជំងឺមហារីក និងជំងឺភ្នែក។ ការទទួលទានម្ទេសប្លោកមិនធ្វើឱ្យឡើងទម្ងន់ទេ ព្រោះម្ទេសប្លោក១៤៩ក្រាម ផ្តល់កាឡូរី៤៦ប៉ុណ្ណោះ។ ៦.ទឹកដូង៖ ទឹកដូងមានជាតិទឹក៩៥ភាគរយ និងសម្បូរដោយអេឡិចត្រូលីត រួមមាន៖ ប៉ូតាស្យូម សូដ្យូម និងសារជាតិក្លរ។ ទឹកដូងក្រៅពីជួយបំពេញជាតិទឹក ក៏អាចជួយបំពេញអេឡិចត្រូលីតក្រោយពីការហាត់ប្រាណ។ ទឹកដូងមានផលល្អចំពោះសុខភាពជាងភេសជ្ជៈជំនួយកម្លាំងផ្សេងទៀត។ ដូច្នេះ គួរជ្រើសពិសាទឹកដូង នាអាកាសធាតុក្ដៅនេះ ដើម្បីអាចជួយបំពេញជាតិទឹកដល់រាងកាយឱ្យបានគ្រប់គ្រាន់។
៧.ផ្លែស្ត្រប់បឺរី៖ ផ្លែស្ត្រប់បឺរី មានជាតិទឹក៩១ភាគរយ អាចជួយបង្គ្រប់ជាតិទឹកដែលរាងកាយត្រូវការប្រចាំថ្ងៃ។ ម្យ៉ាងទៀតផ្លែនេះ ក៏សម្បូរវីតាមីន ជាតិសរសៃ សារធាតុប្រឆាំងអុកស៊ីតកម្ម និងរ៉ែផ្សេងៗ។ ក្នុងនោះ ក៏មានវីតាមីន C សារធាតុហ្វូឡាត និងមេនហ្គាណែស ។ ការទទួលទានផ្លែស្ត្រប់បឺរីរាល់ថ្ងៃ ក៏អាចការពារជំងឺបេះដូង ជំងឺទឹកនោមផ្អែម ជំងឺចាស់វង្វេង និងជំងឺមហារីក។ ៨.ផ្លែក្រូចថ្លុង៖ ផ្លែក្រូចថ្លុង មានជាតិទឹក៨៨ភាគរយ សម្បូរដោយជាតិសរសៃ វីតាមីនA ប៉ូតាស្យូម សារធាតុហ្វូឡាត និងវីតាមីនC ជួយដល់ប្រព័ន្ធភាពស៊ាំ ជួយដល់ការសម្រកទម្ងន់ ក៏ដូចជាបញ្ចុះកូលេស្ត្រេរ៉ូល សម្ពាធឈាម និងកម្រិតជាតិស្ករក្នុងឈាម។ ៩.ផ្លែក្រូច៖ ផ្លែក្រូចមានជាតិទឹក៨៨ភាគរយ។ ផ្លែក្រូចមួយផ្លែអាចផ្តល់ជាតិទឹក១១៨មីល្លិលីត្រ ជាតិសរសៃ និងសារធាតុចិញ្ចឹមផ្សេងទៀត។ វីតាមីនC និងប៉ូតាស្យូម ក្នុងផ្លែក្រូច អាចពង្រឹងប្រព័ន្ធភាពស៊ាំ និងសុខភាពបេះដូង។
១០.ផ្លែឪឡឹក៖ ផ្លែឪឡឹក មានផ្ទុកជាតិទឹករហូតដល់៩២ភាគរយ។ ផ្លែឪឡឹក១៥៤ក្រាម ស្មើនឹងទឹក១១៨មីល្លិលីត្រ និងមានជាតិសរសៃ និងសារធាតុចិញ្ចឹមផ្សេងទៀតដូចជា វីតាមីនC វីតាមីនA និងម៉ាញ៉េស្យូម។ មួយវិញទៀត ផ្លែឪឡឹក ក៏មានកាឡូរីទាប ដែលជួយដល់ការសម្រកទម្ងន់ ជួយឱ្យឆាប់ឆ្អែត និងកាត់បន្ថយចំណង់អាហារ។ ១១.ផ្លែប៉េស៖ ផ្លែប៉េស មានផ្ទុកជាតិទឹក៨៩ភាគរយ និងសម្បូរដោយសារធាតុចិញ្ចឹមផ្សេងទៀតដូចជា វីតាមីន A C B និងប៉ូតាស្យូម។ ការទទួលទានផ្លែប៉េស ទាំងសំបកអាចទទួលបានសារធាតុប្រឆាំងអុកស៊ីតកម្មដូចជា អាស៊ីត chorogenic និងកាឡូរីទាប ជួយឱ្យឆាប់ឆ្អែតល្អ ចំពោះអ្នកចង់សម្រកទម្ងន់៕ អត្ថបទដកស្រង់៖ Hello គ្រូពេទ្យ
