រាជធានីភ្នំពេញ៖ ប្រធានអង្គការពាណិជ្ជកម្មពិភពលោក (WTO) លោកស្រី អ៊ិនហ្កូហ្ស៊ី អូកុនចូ-អ៊ីវីឡា (Ngozi Okonjo-Iweala) ថ្លែងថា សង្គ្រាមមជ្ឈិមបូព៌ាបង្កឡើងរួមគ្នាដោយអាម៉េរិក-អ៊ីស្រាអែលទៅលើអ៊ីរ៉ង់ បានរុញច្រានប្រព័ន្ធពាណិជ្ជកម្មពិភពលោក ឱ្យជួបការរំខានអាក្រក់បំផុតមិនធ្លាប់មានក្នុងរយៈពេល៨០ឆ្នាំមកនេះ។ 

«សណ្តាប់ធ្នាប់ពិភពលោក និងប្រព័ន្ធពហុភាគីនិយមដែលយើងប្រើ បានផ្លាស់ប្តូរហើយ។ យើងមិនអាចបដិសេធចោលទំហំនៃបញ្ហាដែលពិភពលោកកំពុងប្រឈមនាពេលនេះនោះទេ» នេះជាការថ្លែងរបស់លោកស្រី នៅក្នុងកិច្ចប្រជុំថ្នាក់រដ្ឋមន្រ្តី ដែលរៀបចំដោយអង្គការពាណិជ្ជកម្មពិភពលោក នៅរដ្ឋធានីយុនដេ ប្រទេសកាមេរូន កាលពីថ្ងៃ២៦មីនា ហើយត្រូវបានស្រង់យកទៅចុះផ្សាយដោយសារព័ត៌មាន Al Jazeera។

អង្គការពាណិជ្ជកម្មពិភពលោក មើលឃើញថា ដោយសារតម្លៃប្រេងហក់ឡើងខ្ពស់ អឺរ៉ុប (ដែលសុទ្ធសឹងតែជាប្រទេសអ្នកមាន) ក៏ត្រូវប្រឈមនឹងការកើនឡើងយឺតផ្នែកសេដ្ឋកិច្ចដែរ ហើយអង្គការនេះ ថែមទាំងហ៊ានព្យាករថា តម្លៃប្រេង នឹងបន្តហក់ឡើងយ៉ាងលឿនបន្ថែមទៀត ក្នុងឆ្នាំ២០២៦នេះ។ បច្ចុប្បន្ន តម្លៃប្រងជាសាកល បានហក់ឡើងចម្លោះពី៩០ទៅ១០០ដុល្លារក្នុង១បារ៉ែល។ ដោយសារតម្លៃប្រេងសាកលកើនឡើង តម្លៃប្រេងតាមប្រទេសជាច្រើនលើពិភពលោក ក៏កើនឡើងផងដែរ៕