ក្រុងបាត់ដំបង៖ ជនល្មើស៣នាក់សុទ្ធសឹងជាមនុស្សស្រី ត្រូវបានកម្លាំងនគរបាលតាមប្រមាញ់ ក្រោយពួកគេធ្វើសកម្មភាពលួចគ្រឿងអលង្ការ និងលុយសរុបជាង១០ម៉ឺនដុល្លារអាម៉េរិក នៅភូមិផ្កាស្លា សង្កាត់ចំការសំរោង ក្រុងបាត់ដំបង ខេត្តបាត់ដំបង...។ 

យោងតាមរបាយការណ៍ពីអគ្គស្នងការដ្ឋាននគរបាលជាតិ​ នៅរៀលថ្ងៃទី២៣ ខែមីនា ឆ្នាំ២០២៦នេះ​ បានឱ្យដឹងថា ក្រោយទទួលបានពាក្យបណ្ដឹងពីជនជនរងគ្រោះ ឈ្មោះ ថាច់ ប៊ុនសុង ពាក់ព័ន្ធនឹងអំពើលួច បណ្ដាលឱ្យបាត់បង់លុយខ្មែរចំនួន៤៩៥ ០០០ ០០០ (បួនរយកៅសិបប្រាំលានរៀល), លុយដុល្លារចំនួន៤០០០ដុល្លារ (បួនពាន់ដុល្លារ), ខ្សែកមាសចំនួនទម្ងន់៣តំឡឹង និងខ្សែកកាឡៃចំនួនមួយខ្សែផងដែរ។ ភ្លាម.. ដោយមានការសម្របសម្រួលនីតិវិធីពីលោក មាស ចាន់ពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តបាត់ដំបង លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្ត បានចាត់កម្លាំងផ្នែកជំនាញព្រហ្មទណ្ឌ បើកការស៊ើបអង្កេតស្រាវជ្រាវ ទើបធ្វើការឃាត់ខ្លួនជនសង្ស័យចំនួន០៣នាក់៖ ទី១-ឈ្មោះ វង់ កញ្ញា, ទី២-ឈ្មោះ ម៉ុន ម៉ុត, និងទី៣-ឈ្មោះ ប៉ាកកា ជីឡូរី ភេទស្រី។ 

ទោះយ៉ាងណា នៅចំពោះមុខសមត្ថកិច្ច ជនសង្ស័យខាងលើ បានឆ្លើយសារភាពថា ពួកខ្លួនពិតជាបានធ្វើសកម្មភាពចូលផ្ទះរបស់ជនរងគ្រោះ លួចលុយ និងគ្រឿងអលង្ការ ពិតប្រាកដមែន។ បច្ចុប្បន្ន ជនសង្ស័យ ត្រូវបានកម្លាំងនគរបាលក្រុងបាត់ដំបង សាងសំណុំរឿងបញ្ជូនទៅការិយាល័យជំនាញ នៃស្នងការដ្ឋាននគរបាលខេត្តបាត់ដំបង ដើម្បីចាត់ការបន្តតាមនីតិវិធីជាធរមាន៕