ខេត្តព្រះវិហារ៖ រដ្ឋមន្រ្តីក្រសួងវប្បធម៌ និងវិចិត្រសិល្បៈ លោកស្រី ភឿង សកុណា នៅថ្ងៃទី២០មីនា ឆ្នាំ២០២៦ បានចុះទៅពិនិត្យ និងវាយតម្លៃការខូចខាតប្រាសាទព្រះវិហារ ដែលបង្កឡើងពីសង្គ្រាមថៃឈ្លានពាន។ លោកស្រីរដ្ឋមន្រ្តី និងប្រតិភូទាំងអស់បានសម្ដែងក្តីរន្ធត់ និងតក់ស្លុតយ៉ាងខ្លាំងចំពោះការបំផ្លិចបំផ្លាញដ៏ធំធេងបំផុតចំពោះបេតិកភណ្ឌពិភពលោកប្រាសាទព្រះវិហារ ដែលជាសម្បត្តិរបស់មនុស្សជាតិ។
លោកស្រី ភឿង សកុណា ថ្លែងថា៖«ការខូចខាត បាក់បែក ដែលបានពិនិត្យឃើញដោយផ្ទាល់ភ្នែកនេះ មានទំហំរាប់រយដងលេីសពីរបាយការណ៍ខូចខាតរៀបចំដោយអាជ្ញាធរជាតិព្រះវិហារ កន្លងទៅដែលបានកត់ត្រាការខូចខាតសរុបចំនួន ៥៦២កន្លែង»។ លោកស្រីបន្ថែមថា គ្រប់ប្រទេសទាំងអស់មានភារកិច្ចក្នុងការការពារសម្បត្តិវប្បធម៌ ហើយសម្បត្តិបេតិកភណ្ឌមិនត្រូវក្លាយជាគោលដៅនៃការវាយប្រហារ ទោះក្នុងកាលៈទេសៈណាក៏ដោយ ផ្អែកតាមអនុសញ្ញាឆ្នាំ១៩៧២ ស្តីពីបេតិកភណ្ឌពិភពលោក និងអនុសញ្ញាឆ្នាំ១៩៥៤ ស្តីពីកិច្ចការពារសម្បត្តិបេតិកភណ្ឌវប្បធម៌ក្នុងជម្លោះប្រដាប់អាវុធ។
គួរបញ្ជាក់ថា ដោយសារវាយប្រហារដោយយោធាឈ្លានពានថៃ ប្រាសាទព្រះវិហារ រងការខូចខាតចំនួន១៤២កន្លែង កាលពីខែកក្កដា ឆ្នាំ២០២៥ និងខូចខាតបន្ថែមចំនួន ៤២០កន្លែងទៀត ក្នុងអំឡុងខែធ្នូ ឆ្នាំ២០២៥ ដោយរាប់ចាប់ពីចំណុចពើយតាឌី គោបុរៈទី១ រហូតដល់គោបុរៈទី៥ ការខូចខាតការដ្ឋានគម្រោងសហប្រតិបត្តិការរបស់ប្រទេសឥណ្ឌានៅគោបុរៈទី៥ និងការដ្ឋានជួសជុលជណ្តើរខាងជើង ដែលជាជំនួយរបស់អាម៉េរិក និងការខូចខាតវត្តកែវសិក្ខាគិរីស្វរៈ៕
