រាជធានីបាងកក៖ ស្ថានភាពសេដ្ឋកិច្ចប្រេងរបស់ប្រទេសថៃ កំពុងធ្លាក់ដុនដាបដល់កម្រិតប្រកាសអាសន្ន ខណៈរាជរដ្ឋាភិបាលបាងកក បានប្តូរទិសដៅទៅសុំទិញប្រេងធូរថ្លៃពីរុស្ស៊ី ដើម្បីយកមកប៉ះប៉ូវភាពបរាជ័យនៃគោលនយោបាយថាមពលផ្ទៃក្នុងរបស់ខ្លួន។ ទន្ទឹមនឹងឧបនាយករដ្ឋមន្ត្រីថៃ អះអាងនៅថ្ងៃអង្គារទី១៧ ខែមីនានេះថា រាជធានីបាងកក កំពុងពិភាក្សាជាមួយរដ្ឋាភិបាលរុស្ស៊ី អំពីលទ្ធភាពក្នុងការទិញប្រេងឆៅ។

ឧបនាយករដ្ឋមន្ត្រីថៃ លោក ភិផាត រជ្ជកិច្ចប្រាកាន (พิพัฒน์ รัชกิจประการ) បានប្រាប់អ្នកសារព័ត៌មានថា រដ្ឋមន្ត្រីការបរទេសថៃ បានពិភាក្សាលើបញ្ហានៃការទិញប្រេងឆៅរបស់រុស្ស៊ីនៅក្នុងកិច្ចប្រជុំមួយនៅទ្វីបអឺរ៉ុប កាលពីថ្ងៃចន្ទទី១៦មីនា ខណៈកិច្ចចរចានេះ កំពុងដំណើរការ ក្រោយអាម៉េរិកបើកដៃឱ្យប្រទេសនានាទិញប្រេងពីរុស្ស៊ីជាបណ្តោះអាសន្ន។ លោកបានបន្តថា រាជរដ្ឋាភិបាលថៃ នឹងពិភាក្សាអំពីតម្លៃប្រេងឥន្ធនៈនៅពេលក្រោយ ខណៈតម្លៃប្រេងម៉ាស៊ូតត្រូវបានកំណត់ថា នឹងកើនឡើងបន្ថែមទៀត។ ឧបនាយករដ្ឋមន្ត្រីថៃ បានបញ្ជាក់ថា រាជរដ្ឋាភិបាលថៃ នឹងព្យាយាមទប់តម្លៃប្រេងម៉ាស៊ូតក្នុងស្រុកត្រឹម៣៣បាត (ឬប្រមាណ១,០២ដុល្លារ)ក្នុងមួយលីត្រ។ បច្ចុប្បន្ន មូលនិធិប្រេងរបស់ប្រទេសនេះ កំពុងស្ថិតក្នុងឱនភាព ឬខ្វះខាតថវិកាដោយកំពុងជាប់បំណុលវ័ណ្ឌក រហូតដល់ទៅជាង១២ពាន់លានបាត (ឬស្មើ៣៧០,៣៧លានដុល្លារ)

លោក សារ៉ាវុធ កែវតាធីព (ศราวุฒิ แก้วตาทิพย์) អគ្គនាយកនៃនាយកដ្ឋានធុរកិច្ចថាមពល បានប្រាប់នៅក្នុងសន្និសីទសារព័ត៌មានមួយថា គិតត្រឹមថ្ងៃអង្គារទី១៧ ខែមីនា ប្រទេសថៃមានទុនបម្រុងប្រេងសម្រាប់ប្រើប្រាស់រយៈពេលយ៉ាងហោចណាស់ ១០១ថ្ងៃ ដែលក្នុងនោះរួមមានទុនបម្រុងក្នុងស្រុក និងការនាំចូលបន្ថែមពីបរទេស ដូចជា ប្រេងចំនួន១,៩លានបារ៉ែលពីប្រទេសអង់ហ្គោឡា និង ៦២៥០០០បារ៉ែល ពីសហរដ្ឋអាម៉េរិក។ សូមជម្រាបថា កន្លងមក ថៃព្យាយាមអួតអាងពីការទប់តម្លៃប្រេងម៉ាស៊ូតក្រោម៣០បាត ប៉ុន្តែការពិតមិនអាចឡើយ ដោយរាជរដ្ឋាភិបាលថៃកំពុងគិតគូរដំឡើងតម្លៃទៅដល់៣៣បាតក្នុងមួយលីត្រ ដែលនេះជាការទម្លាក់បន្ទុកយ៉ាងធ្ងន់ធ្ងរទៅលើស្មាពលរដ្ឋថៃ ដែលកំពុងជួបការលំបាកស្រាប់៕