រាជធានីភ្នំពេញ៖ ឯកអគ្គរាជទូតដាណឺម៉ាកប្រចាំកម្ពុជា លោក ដែននី អានណាន (Danny Annan) បានបង្ហាញការខិតខំប្រឹងប្រែងធ្វើឱ្យទំនាក់ទំនងកម្ពុជា-ដាណឺម៉ាក កាន់តែរីកចម្រើន ជាពិសេស លើផ្នែកសេដ្ឋកិច្ច ពាណិជ្ជកម្ម និងការវិនិយោគ...។

លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ការលើកឡើងរបស់ លោក ដែននី អានណាន ធ្វើឡើងក្នុងជំនួបពិភាក្សាការងារជាមួយ សម្តេចតេជោ ហ៊ុន សែន នៅព្រឹកថ្ងៃចន្ទទី១៦មីនានេះ។ លោក ដែននី អានណាន បានគូសបញ្ជាក់ថា ក្នុងការបំពេញបេសកកម្មជាឯកអគ្គរាជទូតដាណឺម៉ាកប្រចាំកម្ពុជា លោកបានប្រឹងប្រែងក្នុងការពង្រីកទំនាក់ទំនងរវាងកម្ពុជា ឱ្យកាន់តែរីកចម្រើនទាំងក្នុងក្របខណ្ឌនៃការទូតនយោបាយ ជាពិសេស គឺវិស័យសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរ។ ជាការឆ្លើយតប សម្តេចតេជោ ហ៊ុន សែន បង្ហាញនូវការពេញចិត្តចំពោះទំនាក់ទំនងកម្ពុជា-ដាណឺម៉ាកកន្លងមក ដែលមានភាពល្អប្រសើរ និងសង្ឃឹមថា នៅឆ្នាំក្រោយដែលជាខួបលើកទី៦០ឆ្នាំនៃទំនាក់ទំនងកម្ពុជា និងដាណឺម៉ាក ប្រទេសទាំងពីរនឹងមានការរៀបចំកម្មវិធីនានា ដើម្បីអបអរសាទរនៃខួប៦០ឆ្នាំ ដែលនឹងឈានមកដល់នៅឆ្នាំក្រោយនេះ។

សម្ដេចតេជោ ក៏បានឯកភាពលើការធ្វើយ៉ាងណា ឱ្យកម្ពុជា និងដាណឺម៉ាក មានទំនាក់ទំនងកាន់តែល្អបន្ថែមទៀត ជាពិសេស ទៅលើបញ្ហាចម្បងទាំងបីខាងលើឱ្យមានភាពល្អប្រសើរ និងមានការកើនឡើង ស្របទៅនឹងកិច្ចសហប្រតិបត្តិការនៅក្នុងវិស័យនយោបាយ ការទូត រវាងប្រទេសទាំងពីរដែលមានជាមួយគ្នា។ សម្ដេចចាត់ទុកទំនាក់ទំនងរវាងប្រទេសទាំងពីរ គឺនៅមានសក្តានុពលច្រើនទៀត ដែលភាគីទាំងពីរអាចធ្វើការជាមួយគ្នា៕