រាជធានីភ្នំពេញ៖ រដ្ឋាភិបាលនូវែលសេឡង់ បានសម្រេចបន្តផ្តល់ជំនួយចំនួន៧,៥លានដុល្លារដល់កម្ពុជា សម្រាប់ការងារបោសសម្អាតមីន និងអាហារូបករណ៍។ នេះបើតាម លោកឧបនាយករដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេស...។

នៅថ្ងៃសុក្រទី១៣ ខែមីនា ឆ្នាំ២០២៦នេះ លោកឧបនាយករដ្ឋមន្រ្តី ប្រាក់ សុខុន បាននិងកំពុងបំពេញទស្សនកិច្ចផ្លូវការនៅឯប្រទេសនូវែលសេឡង់ ដោយបានជួបពិភាក្សាទ្វេភាគី ជាមួយ លោក វីនស្តុន ភីធឺរ រដ្ឋមន្ត្រីការបរទេសនូវែលសេឡង់។ នៅក្នុងជំនួប លោកបានថ្លែងអំណរគុណ លោក វីនស្តុន ភីធឺរ ចំពោះការបន្តផ្តល់ជំនួយ៧,៥លានដុល្លារដល់កម្ពុជា ដើម្បីយកទៅបម្រើការងារបោសសម្អាតមីន និងសម្រាប់ផ្តល់ជាអាហារូបករណ៍។ ជាមួយគ្នា លោកបានវាយតម្លៃខ្ពស់ចំពោះទំនាក់ទំនងទ្វេភាគីដ៏រឹងមាំរវាងប្រទេសទាំងពីរ ជាពិសេស លើវិស័យសំខាន់ៗដូចជា៖ ពាណិជ្ជកម្ម វិនិយោគ អប់រំ និងកសិកម្ម។ លោកបន្ថែមថា៖«ដើម្បីពង្រឹងចំណងមិត្តភាព និងកិច្ចសហប្រតិបត្តិការទ្វេភាគី ថ្នាក់ដឹកនាំកម្ពុជា-នូវែលសេឡង់ តែងតែឆ្លៀតឱកាសជួបពិភាក្សាគ្នា»។

ក្នុងជំនួបនោះដែរ លោកក៏បានឆ្លៀតឱកាសធ្វើបច្ចុប្បន្នភាពជូនភាគីពាក់ព័ន្ធនៃប្រទេសនូវែលសេឡង់ អំពីការវិវត្តថ្មីៗពាក់ព័ន្ធនឹងស្ថានភាពព្រំដែនកម្ពុជា និងថៃ។ គួរជម្រាបថា លោកឧបនាយករដ្ឋមន្រ្តី ប្រាក់ សុខុន កំពុងធ្វើទស្សនកិច្ចផ្លូវការនៅប្រទេសនូវែលសេឡង់ ចាប់ពីថ្ងៃទី១៣ដល់១៤ ខែមីនា។ បន្ទាប់ពីចេញពីប្រទេសនូវែលសេឡង់ លោកនឹងបន្តបំពេញទស្សនកិច្ចផ្លូវការនៅប្រទេសអូស្ត្រាលី ចាប់ពីថ្ងៃទី១៥ ដល់១៦ ខែមីនា ឆ្នាំ២០២៦៕